ភ្នំពេញ៖ យុវជនម្នាក់ បានស្លាប់ក្នុងថ្លុកឈាមយ៉ាងរន្ធត់ក្រោយបញ្ជូនទៅកាន់មន្ទីរពេទ្យ ហើយដឹកយកមកវិញ ខណៈជនរងគ្រោះ២នាក់ទៀតបានរងរបួសយ៉ាងធ្ងន់ធ្ងរ ត្រូវបានបញ្ជូនទៅសង្គ្រោះបន្ទាន់នៅមន្ទីរពេទ្យ ក្រោយត្រូវបានក្រុមក្មេងស្ទាវ ៦នាក់ ប្រដាប់ដោយដាវស៊ាំម៉ូរ៉ៃនិងកាំបិតបុ័ងតោ ជិះមកកាប់ប្រហារដល់វង់ផឹកស៊ីក្នុងរបងផ្ទះជនរងគ្រោះតែម្តង រួចនាំគ្នារត់គេចខ្លួន បានតែ៥ម៉ោង ក៏ត្រូវបានកម្លាំងកងរាជអាវុធហត្ថរាជធានីភ្នំពេញ និងសមត្ថកិច្ចជំនាញ តាមប្រមាញ់ចាប់ខ្លួនបានចំនួន ០៣នាក់ ខណៈបក្ខពួកជនបង្ក៣នាក់ទៀតកំពុងរត់គេចខ្លួន។
សូមបញ្ជាក់ថា ករណីកាប់ប្រហាររហូតមានអ្នកស្លាប់និងរបួសយ៉ាងរន្ធត់នេះ បានកើតឡើងកាលពីវេលាម៉ោង ១០យប់ ថ្ងៃទី២១ ខែកុម្ភៈ ឆ្នាំ២០២១ នៅចំណុចផ្លូវលំ ក្រុម១៩ ភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ។
កម្លាំងជំនាញបានបញ្ជាក់ប្រាប់ថា ជនរងគ្រោះទាំង៣នាក់ខាងលើ រួមមាន ទី១ឈ្មោះ សែម ហេង ភេទប្រុស អាយុ ២៣ឆ្នាំ មុខរបររត់តុ មានទីលំនៅបច្ចុប្បន្នភូមិខ្ទរ សង្កាត់ព្រែកលៀប ខណ្ឌជ្រោយចង្វា រាជធានីភ្នំពេញ (របួសធ្ងន់ សម្រាកព្យាបាលនៅមន្ទីរពេទ្យកាល់ម៉ែត) , ជនរងគ្រោះទី២មានឈ្មោះ ចឹប ចាន់ឌីន ភេទប្រុស អាយុ២៨ឆ្នាំ មុខរបរធ្វើការក្នុងហាងអ៊ីនធឺណេត មានទីលំនៅបច្ចុប្បន្នភូមិខ្ទរ សង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ សម្រាកព្យាបាលនៅមន្ទីរពេទ្យកាល់ម៉ែត និងជនរងគ្រោះទី៣មានឈ្មោះ លី តុ ភេទប្រុស អាយុ ២២ឆ្នាំ មុខរបរជាងពិដាន មានទីលំនៅបច្ចុប្បន្នភូមិស្កូវ ឃុំប្រាសាទ ស្រុកកំពង់ត្របែក ខេត្តព្រៃវែង (ស្លាប់ពេលបញ្ជូនទៅមន្ទីរពេទ្យ សពត្រូវក្រុមគ្រួសារយកទៅធ្វើបុណ្យតាមប្រពៃណី) ។
យោងតាមប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុ គេឃើញក្រុមជនរងគ្រោះ មានគ្នា៥ទៅ៦នាក់ ជួបជុំគ្នាផឹកស៊ីច្រៀងរាំសប្បាយនៅក្នុងផ្ទះ បន្ទាប់មកក៏មានយុវជនមួយក្រុមទៀត មិនស្គាល់អត្តសញ្ញាណ ជិះម៉ូតូ២គ្រឿងមានគ្នា៦នាក់ ក្នុងល្បឿនលឿនកាត់មុនផ្ទះ កើតហេតុក៏មានបក្ខពួកជនរងគ្រោះ បានស្រែកឲ្យបក្ខពួកជនបង្កថា « ពួកហ្អែងជិះម៉ូតូលឿនម៉េសហ្អា » ធ្វើឲ្យក្រុមជនបង្កខឹង ក៏ជិះម៉ូតូត្រលប់មកវិញប្រដាប់ដោយដាវនិងកាំបិតគ្រប់ដៃ ចូលកាប់ក្រុមជនរងគ្រោះដល់ក្នុងផ្ទះទាំងកំរោលតែម្តង។ បន្ទាប់ពីកើតហេតុភ្លាមៗ រហូតដល់ម៉ោង១១និង៤០នាទីយប់ថ្ងៃដដែល កម្លាំងកងរាជអាវុធហត្ថខណ្ឌជ្រោយចង្វា សហការជាមួយកម្លាំងកងរាជអាវុធហត្ថរាជធានីភ្នំពេញ ចាប់បានជនសង្ស័យចំនួន៣នាក់ ភ្លាមៗនៅចំណុចរោងកម្មករស្នាក់នៅរបស់បុរីភ្នំពេញផាក ជាប់ផ្លូវជាតិលេខ ៦អា ភូមិខ្ទរសង្កាត់ព្រែកលៀប ខណ្ឌជ្រោយចង្វារ រាជធានីភ្នំពេញ។
ជនសង្ស័យទាំងនោះរួមមាន៖
១.ឈ្មោះ រុន សុភ័ក្រ (ដៃដល់)ភេទប្រុស អាយុ១៨ឆ្នាំ មុខរបរជាងសំណង់ ទីលំនៅបច្ចុប្បន្នភូមិត្រពាំងខ្នារ ឃុំស្វាយលើ ស្រុកស្វាយលើ ខេត្តសៀមរាប។
២.ឈ្មោះ ពេជ្រ បុរី (ដៃដល់)ភេទប្រុស អាយុ១៧ឆ្នាំ មុខរបរជាងសំណង់ ទីលំនៅបច្ចុប្បន្នភូមិតាយេក ឃុំតាយេក ស្រុកដំដែក ខេត្តសៀមរាប។
៣.ឈ្មោះ វាន់ ឌឿន (សង្ស័យពាក់ព័ន្ធ)ភេទប្រុស អាយុ ៣០ឆ្នាំ មុខរបរជាងសំណង់ ទីលំនៅបច្ចុប្បន្នភូមិខ្ជាយ ឃុំតំបែ៑លស្រុកតំបែ៑ល ខេត្តត្បូងឃ្មុំ។
វត្ថុតាងចាប់យករួមមាន៖ ម៉ូតូហុងដាសេ១២៥ ពណ៌ខ្មៅ មួយគ្រឿង គ្មានស្លាកលេខ , ម៉ូតូហុងដា សង់ប៊ិច ពណ៌ខ្មៅ ពាក់ស្លាកលេខ ភ្នំពេញ 1BW-5444 , ដាវ ចំនួន០១ដើម , ទូរស័ព្ទចំនួន០២ គ្រឿង។
ចំណែកបក្សពួកដែលរត់គេចខ្លួនមានចំនួន ៤នាក់ រួមមាន ៖ ឈ្មោះ រ៉ា ភេទប្រុស, ឈ្មោះ មិត្ត ហៅអាបង ភេទប្រុស, ឈ្មោះ រិទ្ធ ភេទប្រុស និងឈ្មោះ ក្រឹម ភេទប្រុស កំពុងតាមស្វែងរកចាប់ខ្លួនបន្ត។
បច្ចុប្បន្នជនសង្ស័យនិងវត្ថុតាងដែលចាប់ខ្លួនបាន ត្រូវបានបញ្ជូនទៅការិយាល័យព្រហ្មទណ្ឌអាវុធហត្ថរាជធានីភ្នំពេញដើម្បីសាកសួរ និងឃាត់ខ្លួនបណ្តោះអាសន្ន កសាងសំណុំរឿងបញ្ជូនខ្លួនទៅកាន់តុលាការ ចាត់ការតាមច្បាប់បន្តទៀត ៕
