ខេត្តស្វាយរៀង: លោក ឃុន រតនា អភិបាលរងនៃគណៈអភិបាលក្រុងស្វាយរៀងនិងលោកស្រី គង់ បូទុម ប្រធានគណ:កម្មការទ្រទ្រង់សាលាបឋមសិក្សាព្រះសីហនុ នៅព្រឹកថ្ងៃទី៤ ខែមេសា ឆ្នាំ២០២៥នេះ បានអញ្ជើញជាអធិបតីក្នុងពិធីប្រគល់រង្វាន់និងប័ណ្ណសរសើរដល់សិស្សទទួលបាននិទ្ទេសAចំនួន៥៩១នាក់ ស្រី ចំនួន៣០៦ នាក់ ក្នុងឆមាសលើកទី១ ឆ្នាំសិក្សា២០២៤-២០២៥នៅសលាបឋមសិក្សាព្រះសីហនុក្រុងស្វាយរៀងខេត្តស្វាយរៀង។
លោកអភិបាលរងក្រុងស្វាយរៀងបានមានប្រសាសន៍ថា: ក្នុងនាមអាជ្ញាធរក្រុង លោកសូមចូលរួមអបអរសាទរជាមួយមាតាបិតា អាណាព្យាបាល និងប្អូនៗក្មួយៗសិស្សានុសិស្សទាំង៥៩១រូប ដែលទទួលបាននិទ្ទេស A ក្នុងសម័យប្រឡងឆមាសលើកទី១ កាលពីពេលកន្លងទៅថ្មីៗសម្រាប់ឆ្នាំសិក្សា២០២៤.២០២៥នេះ។ តាមរយៈលទ្ធផលប្រឡងនៅក្នុងសាលាបឋមសិក្សាព្រះសីហនុក្រុងស្វាយរៀងនៅដើមឆ្នាំសិក្សានេះគឺទទួលបានលទ្ធផលល្អប្រសើរដោយមានអត្រាសិស្សប្រឡងជាប់សរុបទទួលបាននិទ្ទេស A ចំនួន ៥៩១នាក់ស្រីចំនួន៣០៦នាក់ចាប់ពីបច្ចេកទី១ដល់បច្ចេកទេសទី៦ដែលមានសិស្សសរុបទាំងអស់ចំនួន១៤២០នាក់ក្នុងនោះស្រីចំនួន៦៩២នាក់។
លោកបានបន្តថា: ក្នុងនាមរដ្ឋបាលក្រុង លោកសូមសម្ដែងនូវការអរគុណ ចំពោះមាតាបិតា អាណាព្យាបាលសិស្ស ដែលបានលើកទឹកចិត្ត ជំរុញ តាមដាន និងចូលរួមគាំទ្រគ្រប់សកម្មភាពទាំងឡាយ នៃការសិក្សារបស់កូនចៅរបស់ខ្លួន និងអគុណចំពោះគណៈគ្រប់គ្រងសាលា ព្រមទាំងលោកគ្រូ អ្នកគ្រូទាំងអស់ដែលបានខិតខំយកចិត្តទុកដាក់បង្រៀនសិស្សឲ្យទទួលបានលទ្ធផលដ៏ល្អប្រសើរបែបនេះ ។
លោកបានផ្ដាំផ្ញើដល់ប្អូនៗក្មួយៗសិស្សានុសិស្សទាំងអស់ ត្រូវចេះតស៊ូអំណត់ព្យាយាម ដោយយកចិត្តទុកដាក់រៀនសូត្រឲ្យបានពូកែថែមទៀតនៅពេលរៀនបន្តនៅថ្នាក់វិទ្យាល័យនាពេលខាងមុខ។
– ត្រូវធ្វើជាកូនល្អ សិស្សល្អ មិត្តល្អ និងធ្វេីអំពើណាដែលល្អ ព្រមទាំងមានផលប្រយោជន៍ដល់សង្គមជាតិ។
– ត្រូវចៀសឲ្យឆ្ងាយពីគ្រឿងញៀន និងគ្រឿងស្រវឹងគ្រប់ប្រភេទ និងចៀសវាងឲ្យបាននូវអំពើអបាយមុខផ្សេងៗ ជាពិសេសល្បែងស៊ីសងជាដើម។
– ត្រូវបន្តប្រតិបត្តិខ្លួនជាកូនល្អ សិស្សនិស្សិតល្អ និងមិត្តភក្ដិល្អ និងអភិវឌ្ឍន៍ខ្លួនឲ្យក្លាយជាយុវជន ដែលប្រកបដោយគុណសម្បត្តិបួនយ៉ាង គឺបញ្ញា សីលធម៌ សុជីវធម៌ និងកាយសម្បទាមាំមួន។
– ត្រូវចូលរួមគោរពប្រតិបត្តិច្បាប់ចរាចរណ៍ឲ្យបានខ្ជាប់ខ្ជួនដើម្បីសុវត្ថិភាពខ្លួនឯងផង និងអ្នកដទៃផង “បើធ្វើដំណើរតាមម៉ូតូ ត្រូវពាក់មួកសុវត្ថិភាព បើធ្វើដំណើរតាមរថយន្តត្រូវពាក់ខ្សែក្រវ៉ាត់ឲ្យបានត្រឹមត្រូវ” ។
ជាចុងបញ្ចប់នៃពិធីនេះ លោកអភិបាលរងក្រុងនិងលោកស្រីប្រធានគណ:កម្មការទ្រទ្រង់សាលាបឋមសិក្សាព្រះសីហនុបានចែករង្វាន់ជូនដល់ប្អូនៗក្មួយៗដែលប្រឡងជាប់និទ្ទេសA ទាំង៥៩១នាក់ ក្នុងម្នាក់ៗទទួលបាន៖ ប័ណ្ណសរសើរ១ សៀវភៅសរសេរ១ក្បាល ប៊ិច១ដើម ខ្មៅដៃ១ដើម បន្ទាត់១ និងថវិកា ១មុឺន រៀលផងដែរ៕ ( សុភក្តី ស្វាយរៀង)
