បន្ទាយមានជ័យ៖ បុរសម្នាក់ត្រូវត្រូវបានកម្លាំងកងរាជអាវុធហត្ថមូលដ្ឋានក្រុងប៉ោយប៉ែតចាប់វាយខ្នោះរួចបញ្ជូនទៅសាលាដំបូងខេត្តបន្ទាយមានជ័យ ក្រោយបានចាប់រំលោភមិត្តភ័ក្ររបស់ប្រពន្ធបានសម្រេច ដែលបានប្រព្រឹត្តកាលពីវេលាម៉ោង២យប់ ឈានចូលថ្ងៃទី១៧ ខែមេសា ឆ្នាំ២០២១ នៅចំណុចបន្ទប់ជួលជិតខារ៉ាអូខេអេស្វផ្លាស ស្ថិតក្នុងភូមិសាមគ្គីមានជ័យ សង្កាត់-ក្រុងប៉ោយប៉ែត ខេត្តបន្ទាយមានជ័យ ។
បើតាមប្រសាសន៍របស់លោក វរសេនីយ៍ត្រី នួន នីណារ៉ូ មេបញ្ជាការកងរាជអាវុធហត្ថមូលដ្ឋានក្រុងប៉ោយប៉ែតបានឲ្យដឹងថា ការឃាត់ខ្លួនជនសង្ស័យខាងលើនេះក្រោយពី កម្លាំងជំនាញអាវុធហត្ថបានទទួលពាក្យបណ្ដឹងរបស់នារីម្នាក់ឈ្មោះ អ.វ អាយុ៣២ឆ្នាំ ដែលអះអាងថាជនសង្ស័យឈ្មោះ អៀក សេងថៃ ភេទប្រុស អាយុ៣៥ឆ្នាំ មុខរបរជាងជួសជុលរថយន្ត រស់នៅភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ខេត្តបន្ទាយមានជ័យ បានប្រព្រឹត្តអំពើអនាចារ្យចាប់រំលោភរូបនាង ។
ពាក់ព័ន្ធករណីនេះ ជនសង្ស័យបានឆ្លើយសារភាពចំពោះមុខសមត្ថកិច្ចថា ខ្លួនពិតជាបានរំលោភនារីរងគ្រោះពិតប្រាកដមែន ដោយនៅយប់ថ្ងៃកើតហេតុយប់ថ្ងៃទី១៦ ខែមេសា ខ្លួនបានធ្វើដំណើរពីបន្ទាយមានជ័យទៅលេងប្រពន្ធនៅឯទីក្រុងប៉ោយប៉ែតព្រោះតែនឹកប្រពន្ធពេក។ តែពេលទៅដល់ខ្លួនបានឈៀងទៅជួបជាមួយមិត្តភក្តិផឹកស៊ី លុះស្រវឹងក៏ត្រឡប់ទៅរកប្រពន្ធនៅឯបន្ទប់ជួល ។ ពេលទៅដល់អត់ឃើញប្រពន្ធទេគឺឃើញតែមិត្តភក្តិរបស់ប្រពន្ធគេងនៅលើគ្រែម្នាក់ឯង ។ ខណៈនោះបុរសរូបនេះបានស្ទុះចូលទៅល្បួងនិងចាប់រំលោភតែម្តង ដោយពេលនោះនារីគ្រោះអត់ព្រមទេតែខ្លួនបានច្របាច់កនិងគម្រាមសម្លាប់ទើបនារីរងគ្រោះជាមិត្តភក្តិរបស់ប្រពន្ធព្រមឲ្យរំលោភរហូតបានសម្រេច ៕
