ភ្នំពេញ៖ បន្ទាប់ពីក្រុមលក់ឡេ អាងឪពុកពាក់ផ្កាយបី ហើយកាឡៃរឿង «ទុំទាវ» នាំឲ្យប៉ះពាល់យ៉ាងធ្ងន់ធ្ងរដល់ព្រះពុទ្ធសាសនា និងអក្សរសិល្ប៍ខ្មែរ ហើយក្រសួងវប្បធម៌ និងវិចិត្រសិល្បៈ គ្រាន់តែហៅទៅអប់រំ និងធ្វើកិច្ចសន្យានោះ បង្កឲ្យមានការរិះគន់យ៉ាងខ្លាំងពីប្រជាពលរដ្ឋខ្មែរគ្រប់ស្រទាប់ ទើបលោក ហ៊ុន ជា សរសេរបែបឌឺដងឲ្យថា «ឡេគេប្រើត្រូវ ព្រោះក្រសួងពាក់ព័ន្ធរួញមាត់អស់ហើយ មើលគីឡូឡេគេផង ឲ្យអូនសុំទោស!»។
ក្រោយ អាជី អាម៉ី និងក្រុមសម្ដែងរឿង «ទុំទាវ២០២១» ទាំងអស់ ត្រូវបានក្រសួងវប្បធម៌ និងវិចិត្រសិល្ប៍ ហៅទៅអប់រំ និងធ្វើកិច្ចសន្យា បញ្ចប់រឿងនោះមក ប្រជាពលរដ្ឋខ្មែរ សាស្រ្ដាចារ្យអក្សរសាស្រ្ដ និងព្រះសង្ឃ ក៏ដូចជា អ្នកនយោបាយ បានរិះគន់យ៉ាងខ្លាំង ចំពោះសកម្មភាពខាងលើនេះ។ ការមិនដាក់ទោសទណ្ឌបែបនេះ ធ្វើឲ្យមានការរិះគន់មកលើរដ្ឋាភិបាលកម្ពុជាថា កម្ពុជានៅតែមានរបបនិទ្ទណ្ឌភាពបន្ដទៀត ដោយអ្នកមានខ្នងបង្អែក មានលុយកាក់ និងយសស័ក្ដិ បើប្រព្រឹត្ដខុសច្បាប់ គ្រាន់តែហៅមកអប់រំ និងធ្វើកិច្ចសន្យា ហើយឲ្យត្រឡប់ទៅផ្ទះវិញ ដេកយ៉ាងសុខស្រួល។ ដោយឡែកក្រីក្រ និងអ្នកអត់លុយវិញ បើពួកគាត់ប្រព្រឹត្ដខុស គ្មានលុយកាក់ឲ្យគេ ពិតជាត្រូវដេកគុក ជាក់ជាមិនខាន តួយ៉ាង ដូចករណី ចំប៉ឺខ្មៅ… ជាដើម។
ជាមួយនឹងការរិះគន់ពីមហាជនខាងលើនេះ លោកឧត្ដមសេនីយ៍ ហ៊ុន ជា បានសរសេរ នៅទំព័រ HC ហ៊ុន ជា ដើម្បីខ្មែរ នៃបណ្ដាញសង្គមហ្វេសប៊ុក កាលពីថ្ងៃទី១៦ ខែកុម្ភៈ ឆ្នាំ២០២១ថា រឿង «ទុំទាវ២០២១» ក្រសួងពាក់ព័ន្ធ ដែលត្រូវតែដោះស្រាយ រួមមាន ១-ក្រសួងព័ត៌មាន ២-ក្រសួងវប្បធម៌ និងវិចិត្រសិល្បៈ ៣-ក្រសួងធម្មការ និងសាសនា ហើយនិងទី៤-ក្រសួងអប់រំ។ ច្បាប់គ្រប់យ៉ាងដែលអាចពាក់ព័ន្ធនឹងក្រសួងខាងលើ ប្រហែលជាត្រូវបានដាក់ក្នុងទូ ហើយទុកក្នុងបន្ទប់យ៉ាងល្អ ក្រោយលាបឡេមិនធម្មតារបស់អូនទាវ ដើម្បីបន្ទុំសាច់ឲ្យសល្អ។
លោកឧត្ដមសេនីយ៍ ហ៊ុន ជា បានសរសេរបន្ដថា បើតាមខ្ញុំឮប្រជាពលរដ្ឋ ដូចជាមិនពេញចិត្តទេ ហើយពួកគាត់បានឲ្យខ្ញុំ ជួយបង្ហាញពីអារម្មណ៍ពួកគាត់ផង គឺថាថ្ងៃក្រោយ បើមានអ្នកណាធ្វើខុស ឬសម្ដែងប៉ះពាល់ដល់វប្បធម៌ជាតិហើយ គឺអស់បារម្ភ ដោយប្រើ៖ ១-ប្រើប្រេងក្រឡាសញ្ញាតាប៉ិលោកខែ, ២-រកលុយឲ្យបាន ចាប់ពី២០-៣០ម៉ឺនក្នុងមួយថ្ងៃ, ៣-ធ្វើលិខិតសុំទោសទុកឲ្យហើយទៅ ព្រោះយុទ្ធសាស្រ្តខាងលើអាចជួយលោកអ្នកបាន។
លោក ហ៊ុន ជា បានបន្ដថា «សម្រាប់ប្រជាពលរដ្ឋ និងព្រះសង្ឃ ដែលខ្ញុំបានជួប ពួកគាត់បានសួរថា ក្រោយខ្ញុំបង្ហោះ សូមការបកស្រាយ មានក្រសួងណាឆ្លើយតបឬអត់? ចម្លើយ៖ ឡេគេប្រើត្រូវ ព្រោះក្រសួងពាក់ព័ន្ធរួញមាត់អស់ហើយ មើលគីឡូឡេគេផង ឲ្យអូនសុំទោស! ៕
