ដើម្បីចូលរួមជួយទំនុកបំរុង ដល់ព្រះសង្ឃ ដែលគង់ចាំព្រះវស្សា ក្នុងទីអារាម សម្រាប់ការនិមន្តសិក្សារៀនសូត្រពីធម៌វិន័យ ទៅតាមទំនៀមទំលាប់ប្រពៃណីព្រះពុទ្ធសាសនា ក្នុងនាមជាពុទ្ធសាសនូបត្ថម្ភ នៅព្រឹកថ្ងៃអាទិត្យ ៦កើត ខែស្រាពណ៍ ឆ្នាំជូត ទោស័ក ព.ស ២៥៦៤ ត្រូវនឹងថ្ងៃទី២៦ ខែកក្កដា ឆ្នាំ២០២០ លោកជំទាវ ចាន់ ថេត និងឯកឧត្តម ម៉េង សុខអាន ទីប្រឹក្សាក្រសួងព័ត៌មាន ព្រមទាំងពុទ្ធបរិស័ទជាច្រើនរូប នៅរាជធានីភ្នំពេញ និងពុទ្ធបរិស័ទចំណុះជើងវត្ត ដោយមានការជួយឧបត្ថម្ភពីសម្តេចព្រះសក្យមុនី កិត្តិបណ្ឌិតទស្សនវិជ្ជា រ័ត្ន សារឿន សមាជិកថេរះសភាសង្ឃ នៃព្រះរាជាណាចក្រកម្ពុជា ព្រះអនុគណខណ្ឌសែនសុខ និងជាព្រះគ្រូចៅអធិការវត្តសំរោងអណ្តែត បានរួមគ្នានាំយកនូវទានព្រះវស្សា ទ័យវត្ថុជាច្រើនមុខ និងបច្ច័យសម្រាប់ចូលរួមបន្តកសាងវត្ត និងបច្ច័យបួន ទៅវេរប្រគេនដល់ព្រះសង្ឃ គង់ចាំព្រះវស្សា នៅវត្តចំនួន២ គឺនៅវត្តត្រពាំងស្នោរ និងវត្តភ្នំរាប់បាត្រ ហៅវត្តគីរីវង្គត រាប់បាត្រ ស្ថិតក្នុងភូមិព្រៃខ្មែរ ឃុំអណ្តូងស្នាយ ស្រុករលាប្អៀរ ខេត្តកំពង់ឆ្នាំង។
សូមបញ្ជាក់ថា ការពុទ្ធបរិស័ទ ដែលជាពុទ្ធសាសនូបត្ថម្ភ មកពីគ្រប់ទិសទី តែងតែគៀងគរគ្នាប្រមែលប្រមូលនូវគ្រឿងប្រទីពឈ្វាលារ សម្រាប់ការបំភ្លឺ ក្នុងខណះដែលព្រះសង្ឃ គង់សិក្សារៀនសូត្រពីធម៌វិន័យ ព្រះត្រៃយ៍បិដក ក្នុងទីអារាម និងនាំយកនូវសំពតសាដក់ ទ័យវត្ថុផ្សេងៗ ដែលជាគ្រឿងប្រើប្រាស់ និងគ្រឿងជាចង្ហាន់ សម្រាប់ប្រគេនដល់ព្រះសង្ឃ ព្រោះក្នុងខណះពេលនេះ ជារដូវចូលព្រះវស្សា ដែលជារដូវមានភ្លៀងធ្លាក់ច្រើន និងពុទ្ធបរិស័ទកំពុងមមាញឹកធ្វើស្រែចំការ ដែលព្រះសង្ឃ លំបាកក្នុងការចេញនិមន្តគោរចបិណ្ឌបាត្រ នៅតាមភូមិស្រុក។
ពិធីបុណ្យចូលព្រះវស្សា គឺជាពិធីបុណ្យមួយដែលមានសារៈសំខាន់ក្នុងព្រះពុទ្ធសាសនា ជាពេលវេលាដ៏សំខាន់សម្រាប់ភិក្ខុសង្ឃ និងសាមណេបានរៀនធម៌ និងវិន័យយ៉ាងខ្ជាប់ខ្ជួនតាមពុទ្ធឱវាទ។ បងប្អូនដែលជាអ្នកមានជំនឿទៅលើព្រះពុទ្ធសាសនា តែងតែនាំគ្នាប្រារព្ធពិធីបុណ្យ ដោយនាំយកជាសាដក អង្ករ ភេសជ្ជៈ និងរបស់ប្រើប្រាស់ផ្សេងៗ ទៅប្រគេនព្រះសង្ឃតាមលទ្ធភាព។ ពិធីបុណ្យចូលព្រះវស្សា ប្រារព្ធធ្វើឡើងជារៀងរាល់ឆ្នាំចាប់ពីថ្ងៃ១រោច ខែអាសាធ ដល់ថ្ងៃ ១៥ កើត ខែអស្សុជ។ តែពិធីត្រូវបានចាប់ផ្តើមនៅល្ងាចថ្ងៃទី ១៥កើត ខែអាសាឍ ដោយមានការចូលរួមពីសំណាក់បងប្អូននិងចាស់ទុំចំណុះជើងវត្ត នាំគ្នាហែរទៀនវស្សា សំពត់ សាដក និងសម្ភារៈប្រើប្រាស់ផ្សេងៗ ប្រគេនដល់ព្រះសង្ឃ ហើយក្នុងអំឡុងរយៈ ៣ខែនេះ បងប្អូនដែលមានទម្លាប់គោរពព្រះពុទ្ធសាសនា ក៏និយមបន្តធ្វើម្ហូប នំចំណី និងគ្រឿងប្រើប្រាស់ផ្សេងៗមកប្រគេនជាបន្តបន្ទាប់សម្រាប់ផ្គត់ផ្គង់ព្រះសង្ឃគង់ចាំព្រះវស្សានេះក្នុងអំឡុងពេលនេះដែរ។
ក្រៅពីរបស់ប្រើប្រាស់ និងម្ហូបអាហារ បងប្អូនខ្មែរក៏បានជាវទានវស្សាទៅប្រគេនព្រះសង្ឈផងដែរ ព្រោះយើងមានជំនឿថា ពន្លឺទៀនគឺជួយបំភ្លឺអនាគតជាតិអោយភ្លឺស្រស់បំព្រង និងមានសេចក្តីសុខចម្រើនដោយអំពើល្អ សេចក្តីល្អ ហើយគេ ត្រូវ រក្សា ភ្លើង ទៀន ឱ្យ ឆេះ ជាប់ រហូត គ្រប់ រយៈពេល បី ខែ។ មួយវិញទៀតនេះជាការជួយដល់វត្តអារាមក្នុងការមានទៀនប្រើប្រាស់ដើម្បីដុតបំភ្លឺនៅពេលយប់ផងដែរ។
