ស្ទឹងត្រែង៖ នគរបាលជំនាញបង្ក្រាបគ្រឿងញៀន បានឃាត់ខ្លួនជនជាតិ ឡាវ ចំនួន២នាក់ មេក្លោងជួញដូរគ្រឿងញៀនឆ្លងដែន ដោយចាប់យកបានថ្នាំញៀនជិត៦គីឡូក្រាម នៅចំណុចផ្លូវលំ ភូមិអូរស្វាយ ឃុំអូរស្វាយ ស្រុកបុរីអូរស្វាយសែនជ័យ ខេត្តស្ទឹងត្រែង កាលពីថ្ងៃទី១១ ខែកក្កដា ឆ្នាំ២០២០។
ប្រតិបត្តិការនេះ អនុវត្តន៍តាមវិធានញុះញង់ ដែលមានកម្លាំងជំនាញ «ក៩» នៃមន្ទីរប្រឆាំងគ្រឿងញៀន ដឹកនាំបញ្ជាដោយលោកឧត្ដមសេនីយ៍ យិន បញ្ញារិទ្ធ នាយករងមន្ទីរប្រឆាំងគ្រឿងញៀន សហការជាមួយកម្លាំងនគរបាលខេត្តស្ទឹងត្រែង។
លោកឧត្ដមសេនីយ៍ យិន បញ្ញារិទ្ធ ជនសង្ស័យជាមេក្លោងជួញដូរគ្រឿងញៀន ជនជាតិឡាវទាំង២នាក់នេះមានឈ្មោះ ស៊ូ បាន់ ភេទប្រុស អាយុ៣២ឆ្នាំ ជនជាតិឡាវ មានទីលំនៅបច្ចុប្បន្ន ភូមិណាស៊ែងខាំ ស្រុកសៃ ខេត្តឧត្ដមសៃ ប្រទេសឡាវ និងឈ្មោះ ចាន់ ឌី ភេទប្រុស អាយុ៣១ឆ្នាំ ជនជាតិឡាវ មានទីលំនៅភូមិភាងញ៉ា ស្រុកហ៊ុន ខេត្តឧត្ដមសៃ ប្រទេសឡាវ។
លោកឧត្ដមសេនីយ៍ យិន បញ្ញារិទ្ធបញ្ជាក់ថា ក្នុងប្រតិបត្ដិការបង្ក្រាបគ្រឿងញៀនខាងលើនេះ សមត្ថកិច្ចជំនាញ បានចាប់យកវត្ថុតាងថ្នាំញៀន ប្រភេទម៉េតំហ្វេតាមីន៦កញ្ចប់ មានទម្ងន់សុទ្ធ ៥៩៨៦,២៩ក្រាម។
បច្ចុប្បន្ននេះ កម្លាំងសមត្ថកិច្ចជំនាញ កំពុងសាកសួរ និងកសាងសំណុំរឿងជនសង្ស័យទាំង២នាក់ រួមជាមួយវត្ថុតាង ទៅតុលាការផ្តន្ទាទោសតាមច្បាប់៕
