ភ្នំពេញ៖ ទិដ្ឋភាពដ៏កម្រមួយត្រូវបានគេផ្តិតយកមកបង្ហោះនៅក្នុងបណ្តាញសង្គមដោយគេសង្គេត ឃើញលោកតាងងឹតភ្នែកដើរសុំទាន់ម្នាក់ ពេលដឹងថាព្រះសង្ឃជាសាមណេរតូច ដែលកំពុងគោចរ និមន្តបិណ្ឌបាត បានយកថវិកាដែលខ្លួនសុំគេបានយកមកប្រគេនដល់សាមណេរ ។ ខណៈនោះសាម ណេរតូច បានទទួលយកបច្ច័យដែលជាសទ្ធាជ្រះថ្លារបស់លោកតាកម្សត់ និងបានស្វាធ្យាយធម៌ ពរជ័យដល់លោកតាថែមទៀតផង ។ បន្ទាប់មកសាមណេរនោះបានយកបច្ច័យនោះ ជូនដល់លោកតា កម្សត់វិញ ។
ក្នុងគណនីហ្វេសប៊ុកមួយឈ្មោះ Sun Theana កាលពីថ្ងៃទី១៦ មិថុនា ឆ្នាំ២០២១បានបង្ហោះរូបភាព អមដោយសារទាំងស្រុងថា «ថ្ងៃបាននេះបានឃើញរូបភាពមួយធ្វើអោយអារម្មណ៍ស្រស់ថ្លាណាស់ លោកតាដើរសំទានម្នាក់ ឃើញលោកនេនបានយកលុយដែលខ្លួនសុំគេដាក់បាទ្យអោយលោកនេន លោកនេន បានឲ្យធម៍ដល់លោកតាសុំទាន់រួចហើយ ហើយក៏លួចដាក់លុយឲ្យលោកតាវិញ (តាសុំទានគាត់ងងឹតភ្នែក)មិនសូវចេះនិយាយឲ្យវាជាប់ចិត្តទេ ស្តាយមិនបានថតvideo ទាន់កុំអីបានឃើញរូបភាពល្អ ធ្វើអោយអារម្មណ៍ល្អជាងអ្វីដែលខ្ញុំរៀបរាប់និងទៀត»។
ទិដ្ឋមួយនេះពិតជាកម្រនឹងជួបប្រទះណាស់នៅពេលគេឃើញហើយពិតជាធ្វើឲ្យអារម្មណ៍រំភើបរីករាយផង លាយជាមួយអារម្មណ៍ក្តុកក្តួលក្នុងចិត្តណាស់ដោយសារតែលោកតាកម្សត់ដើរសុំទានគេក៏ពិត មែនប៉ុន្តែទឹកចិត្តជ្រះថ្លាក្នុងការធ្វើបុណ្យទានមិនចាញ់សប្បុរសជននានានោះឡើយ ។ ចំណែក សាមណេរ ថ្វីត្បិតតែព្រះជន្មនៅក្មេងប៉ុន្តែហាក់យល់ពីភាពលំបាករបស់លោកតាកម្សត់ណាស់ ទើបមិនដាច់ចិត្តយកបច្ច័យ ដោយគ្រាន់តែទទួលហើយបានដាក់ឲ្យលោកតាវិញ ។
សូមជម្រាបថា បន្ទាប់ពីមហាជនអ្នកលេងបណ្តាញសង្គមបានឃើញនូវទិដ្ឋភាពនេះហើយ បាននាំ គ្នាសែ ចែករំលែក និងចូលខំម៉ិន(comment)យ៉ាងព្រោងព្រាតអំពីទឹកចិត្តដ៏ប្រពៃរបស់លោកតា និងទឹកចិត្តដ៏ថ្លៃថ្លារបស់សាមណេរតូចពិតជាគួរឲ្យកោតសរសើរណាស់ និងធ្វើឲ្យរំជួលចិត្តដល់មហាជនណាស់ ៕
