ក្រសួងការងារគ្រោងចំណាយប្រាក់៤៩៣លានដុល្លារដើម្បីអភិវឌ្ឍន៍លើវិស័យជំនាញ

ភ្នំពេញ៖ មន្ត្រីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ បានប្រាប់ឲ្យដឹងថា ក្រសួងគ្រោងចំណាយថវិកាចំនួនប្រមាណ ៤៩៣លានដុល្លារ ដើម្បីអភិវឌ្ឍន៍វិស័យអប់រំបណ្តុះបណ្តាលបច្ចេកទេសនិងវិជ្ជាជីវៈ (TVET)នៅកម្ពុជា សម្រាប់រយៈពេល ៥ឆ្នាំ (២០២១-២០២៥) ទៅមុខទៀត។
លោក ថង សាម៉ុន អគ្គនាយករង នៃអគ្គនាយកដ្ឋានអប់រំបណ្តុះបណ្តាលបច្ចេកទេសនិងវិជ្ជាជីវៈ នៃក្រសួងការងារនិងបណ្តុះបណ្តាលវិជ្ជាជីវៈ បានឲ្យដឹងនៅថ្ងៃទី១៦ ខែមិថុនា ឆ្នាំ២០២១ថា ថវិកាដែលគ្រោងចំណាយនេះ គឺផ្ដោតលើយុទ្ធសាស្ត្រសំខាន់ៗចំនួន៤ រួមមាន៖
១, ការកសាងនិងកែលម្អហេដ្ឋារចនាសម្ព័ន្ធរូបវន្តរបស់គ្រឹះស្ថានអប់រំបណ្ដុះបណ្ដាលបច្ចេកទេសនិងវិជ្ជាជីវៈ
២, ការបំពាក់ឧបករណ៍បរិក្ខារនិងសម្ភារៈបណ្ដុះបណ្ដាល
៣, ការពង្រឹងសមត្ថភាពអ្នកដឹកនាំគ្រប់គ្រងមន្ត្រីជំនាញនិងគ្រូបច្ចេកទេស
៤, ការបង្កើនបរិមាណនិងគុណភាពជំនាញបច្ចេកទេសនិងវិជ្ជាជីវៈប្រកបដោយបរិយាបន្នយេនឌ័រ។
លោកបានលើកឡើងថា “ថវិកានេះជាថវិកានៅក្នុងផែនការមេ សម្រាប់អភិវឌ្ឍន៍គ្រឹះស្ថានអប់រំបណ្តុះបណ្តាលបច្ចេកទេសនិងវិជ្ជាជីវៈ ដើម្បីឲ្យការបណ្តុះបណ្តាលបានច្រើនតាមតម្រូវការអ្នកចង់ទទួលសេវាអប់រំបណ្តុះបណ្តាលបច្ចេកទេសនេះក៏ដូចជាតម្រូវការទីផ្សារការងារគឺយើងធ្វើម៉េចខិតខំកែលម្អរកសាងអគារសិក្សា រោងជាង បន្ទប់ពិសោធន៍ ថ្លៃស្នាក់នៅបន្ថែមទៀតដើម្បីទទួលសិស្សឲ្យបានច្រើនជាងនេះ។ ហើយឧបករណ៍សម្ភារៈក៏យើងត្រូវបំពាក់បន្ថែម ការបណ្តុះបណ្តាលគ្រូ អ្នកដឹកនាំក៏ដូចជាបង្កើនអាហាររូបករណ៍យើងត្រូវធ្វើញ្ចឹងគឺលុយទាំងអស់ ហើយប្រាក់ចំនួន៤៩៣លាននេះគឺស្ថិតក្នុងផែនការ។ ទាក់ទងការគៀងគរឲ្យបានប្រាក់ទាំងអស់នេះ លោកបានបញ្ជាក់ថា ក្រសួងនឹងព្យាយាមទៅរកថវិការ ការគាំទ្រពីរាជរដ្ឋាភិបាល ក៏ដូចជាដៃគូអភិវឌ្ឍន៍និងវិស័យឯកជន ក៏ដូចជាសប្បុរជននានាដែរ”។
នៅក្នុងទិវាជាតិអប់រំបណ្តុះបណ្តាលបច្ចេកទេស និងវិជ្ជាជីវៈ ហៅថា TVET DAY កាលពីកន្លងទៅនេះ លោកបណ្ឌិត អ៊ិត សំហេង រដ្ឋមន្រ្តីក្រសួងការងារនិងបណ្តុះបណ្តាលវិជ្ជាជីវៈ បានចាត់ទុកការអប់រំបណ្ដុះបណ្ដាលបច្ចេកទេសនិងវិជ្ជាជីវៈ ដើរតួនាទីសំខាន់ណាស់ ក្នុងការអភិវឌ្ឍន៍សេដ្ឋកិច្ចសង្គមរបស់ប្រទេស ព្រមទាំងការបង្កើតនិងទទួលបានការងារធ្វើកាន់តែល្អ និងការជំរុញលើកកម្ពស់ជីវភាពកាន់តែប្រសើរឡើងសម្រាប់ប្រជាជនម្នាក់ៗ ដើម្បីប្រែក្លាយក្តីសុបិន្តក្នុងការផ្ដល់លទ្ធភាពឲ្យប្រជាពលរដ្ឋគ្រប់រូបអាចធ្វើការសិក្សាពេញមួយជីវិតទៅជាការពិត។ លោកបានបន្តថា ហេតុដូច្នេះហើយទើបរដ្ឋាភិបាលបានកំពុងធ្វើការកែទម្រង់ស៊ីជម្រៅក្នុងវិស័យអប់រំវិជ្ជាជីវៈបណ្ដាលបច្ចេកទេសដើម្បីបង្កើតឲ្យមានប្រព័ន្ធឯកភាពអាចឆ្លងទៅមកបានដោយងាយស្រួលនឹងបើកឱកាសអាចធ្វើការសម្រេចចិត្តសិក្សានៅពេលណាទីកន្លែងណានិងវិធីណាក៏បានស្របទៅតាមស្ថានភាពជាក់ស្ដែងរបស់ប្រជាពលរដ្ឋម្នាក់ៗ។
សូមបញ្ជាក់ថា សម្រាប់ទិវាជាតិ TVET DAY លើកទី៤ ឆ្នាំ២០២១នេះ បានទាក់ទាញអ្នកចូលទស្សនាតាមរយៈបណ្តាញសង្គមហ្វេសប៊ុក ក្នុងផេកក្រសួងការងារមានចំនួនរហូតដល់ជាង ៨ម៉ឺននាក់ ហើយចំនួននេះនឹងកើនឡើងបន្តបន្ទាប់ទៀត ដោយសារក្រសួងការងារធ្វើការរក្សាទុកក្នុងបណ្តាញសង្គមនេះ។ ទិវាជាតិនេះ ធ្វើឡើងក្នុងគោលបំណងដើម្បីលើកកម្ពស់ការអប់រំបណ្តុះបណ្តាលបច្ចេកទេស និងវិជ្ជាជីវៈ និងធ្វើការផ្សព្វផ្សាយទៅដល់សិស្ស និស្សិត យុវជន មាតាបិតា អាណាព្យាបាល សាធារណជន និងផ្នែកឯកជនឱ្យបានយល់ដឹងពីសារៈសំខាន់នៃការអប់រំបណ្តុះបណ្តាលបច្ចេកទេស និងវិជ្ជាជីវៈ ក្នុងការជំរុញការអភិវឌ្ឍកម្លាំងពលកម្មជំនាញប្រកបដោយគុណភាព និងប្រសិទ្ធភាពឱ្យឆ្លើយតបទៅនឹងតម្រូវការទីផ្សារការងារក្នុង និងក្រៅប្រទេស៕