ភ្នំពេញ ៖ នៅថ្ងៃទី១៥ ខែមីនា ឆ្នាំ២០២១ ខាងមុខនេះ ទីស្តីការក្រសួងរៀបចំដែនដី នគរូបនីយកម្ម និងសំណង់ នឹងប្តូរទីតាំងពីដីឡូតិ៍លេខ ៧៧១-៧៧៣ មហាវិថីព្រះមុនីវង្ស សង្កាត់បឹងត្របែក ខណ្ឌចំការមន រាជធានីភ្នំពេញ ទៅទីតាំងថ្មី ស្ថិតនៅដីឡូតិ៍ លេខ២០០៥ ផ្លូវលេខ ៣០៧ ភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ។
ក្រសួងរៀបចំដែនដី នគរូបនីយកម្ម និងសំណង់ បញ្ជាក់ថាៈ អគារថ្មីនេះ រៀបចំឱ្យមាន ចំណតរថយន្ត ប្រមាណ ៥០ កន្លែង ដោយសារអគារ ក្រសួងរៀបចំដែនដី សព្វថៃ្ង ខ្វះចំណត បង្កការលំបាក ដល់ការធើ្វដំណើរ។ អគារទីស្តីការថ្មីនេះ មានសាលបដិ សណ្ឋារកិច្ច , អាហារដ្ឋាន សម្រាប់មន្ត្រីបុគ្គលិក និងលម្ហសួនកណ្តាលអគារ សាល ប្រជុំតូចៗ មាន ៣០០ នាក់ ១៥០ នាក់ និងសាលសន្និបាត ចំណុះ ១.៥៨៤ នាក់ ក្នុងនោះ មានកន្លែងតម្កល់ឯកសារ សុរិយោដី និងរដ្ឋបាល សាលបច្ចេកវិទ្យា មន្ទីរពិសោធន៍ ជាតិសំណង់ បន្ទប់សិក្សា បណ្តុះបណា្តលវិជា្ជជីវៈ បណ្ណាល័យ កន្លែងកីឡា។
ប្រភពក្រសួងរៀបចំដែនដី បានឱ្យដឹងថាៈ អគារទីស្តីការក្រសួងថ្មីនេះ សាងសង់ឡើង តាមរចនាបថខ្មែរ រចនាលម្អ ដោយបុស្បុក ប្រាំពីរថ្នាក់ ដំបូលហោជាងមុខដាច់ប្រកប ដោយក្បូរក្បាច់ពិពិតវិចិត្ររចនា ដែលក្រុមការងារ ប្រមូលផ្តុំសិក្សា ចង់លើកស្ទួយនូវសា្នដៃ លម្អស្ថាបត្យកម្ម បុរាណខ្មែរ។ ដោយឡែក ប្លង់បាត មានលម្ហសួនក្នុងអគារ។
សូមជម្រាបថា ៖ អគារទីស្តីការ ក្រសួងរៀបចំដែនដី នគរូបនីយកម្ម និងសំណង់ថ្មីនេះ បានចាប់ផ្តើមការសាងសង់ កាលពីថ្ងៃទី២៨ ខែមករា ឆ្នាំ២០២០។ អគារនេះ មានកម្ពស់ ៥ ជាន់ នៅលើផ្ទៃដី ទំហំ ៣ ហិកតា មានផ្ទៃក្រឡា សំណង់ សរុប ៤៩.៣៨៩ ម៉ែត្រក្រឡា និងក្រឡាផ្ទៃ ប្រើប្រាស់សរុប ប្រមាណ ២៦.៥៦៧ ម៉ែត្រក្រឡា មានផលធៀប ក្រឡាផ្ទៃ បាតសំណង់ ៣២.៥៣%៕
