ភ្នំពេញ ៖ បុរសម្នាក់បើករថយន្តស៊េរីទំនើបមួយគ្រឿង ក្រឡាប់ផ្ងារជើងទ្រមេឃ ខណៈបើកក្នុងល្បឿនលឿន ជ្រុលទៅបុក របាំងថ្មពុះចែកទ្រូងផ្លូវ កាលពីវេលាម៉ោង ៣យប់រំលងអធ្រាត្រ ឈានចូលថ្ងៃទី១០ ខែកុម្ភៈ ឆ្នាំ ២០២១ ស្ថិតនៅតាមបណ្តោយផ្លូវ២១៧ ក្នុងសង្កាត់ស្ទឹងមានជ័យទី២ ខណ្ឌមានជ័យ រាជធានីភ្នំពេញ ។
រថយន្តបង្ក ជារថយន្តស៊េរីទំនើប ដែលមានតម្លៃរាប់ម៉ឺនដុល្លារ ពណ៌ស ស៊េរីឆ្នាំ២០១៩ ពាក់ស្លាកលេខ ភ្នំពេញ2BA-1911 អត្តសញ្ញាណអ្នកបើកបររថយន្ត មិនត្រូវបានស្គាល់នោះទេ ជាបុរសរួមដំណើរជាមួយនារី២នាក់ទៀត ។
តាមប្រភពពីកន្លែង កើតហេតុបានឲ្យដឹងថាមុន ពេលកើតហេតុ គេឃើញរថយន្តបង្ក ធ្វើដំណើរតាមបណ្តោយផ្លូវ២១៧ ទិសដៅពីលិចទៅកើត ក្នុងល្បឿនលឿនខ្លាំង ខណៈមកដល់ចំណុចកើតហេតុ ក៏ជ្រុលទៅបុកក្បាលរបាំងថ្មពុះចែកទ្រូងផ្លូវ បណ្តាលឲ្យបាក់បែក ឯរថយន្តក្រឡាប់ផ្ងារជើងឡើងលើ តែមិនបណ្ដាលឲ្យ នរណាម្នាក់ រងរបួសនោះទេ។
ក្រោយកើតហេតុ សមត្ថកិច្ចវាស់វែង យករថយន្តបង្កទៅរក្សាទុក នៅការិយាល័យចរាចរណ៍ផ្លូវគោក នៃស្នងការដ្ឋាន នគរបាលរាជធានីភ្នំពេញ រង់ចាំធ្វើការដោះស្រាយគ្នា នៅពេលក្រោយ៕
