ភ្នំពេញ៖ បុរសម្នាក់ត្រូវបានគេប្រទះឃើញស្លាប់នៅនៅចិញ្ចើមផ្លូវ បង្កការភ្ញាក់ផ្អើលដល់ប្រជាពលរដ្ឋរ នៅចំណុចមុខផ្ទះលេខ៧០១ ផ្លូវលេខ៣៩MC ភូមិត្នោតជ្រុំ៤ សង្កាត់បឹងទំពុនទី២ ខណ្ឌមានជ័យ រាជធានីភ្នំពេញ នៅព្រឹកថ្ងៃទី២៩ ខែមិថុនា ឆ្នាំ ២០២១ ។
ពាក់ព័ន្ធនឹងករណីនេះបន្ទាប់ពីមានការស្រាវជ្រាវតាំងពីវេលាម៉ោង១១និង៣០នាទីយប់ថ្ងៃទី២៨ ខែមិថុនា ឆ្នាំ២០២១ រហូតមកទល់នឹងព្រឹកថ្ងៃទី២៩ ខែមិថុនា ឆ្នាំ ២០២១ សមត្ថកិច្ចបានឲ្យដឹងថា សាកសពមានឈ្មោះ លាង ហេង ភេទប្រុស អាយុ២១ឆ្នាំ ជានិស្សិតផ្នែកសំណង់ ស្នាក់នៅភូមិខ្វា សង្កាត់ដង្កោ ខណ្ឌដង្កោ ។ ជនរងគ្រោះបានជិះម៉ូតូម៉ាកស៊ុយសាគីនិច ពណ៌ស ពាក់ស្លាកលេខ ភ្នំពេញ 1FQ-6468 ក្នុងទិសដៅពីជើងទៅត្បូងក្នុងល្បឿនលឿន លុះដល់ចំណុចកើតហេតុ ក៏ជ្រុលទៅបុកជាមួយជើងឆ័ត្រ ហើយដួលអូសបោកស្លាប់យ៉ាងរន្ធត់ ចំណែកម៉ូតូមិនទាន់អស់ល្បឿនបានផ្លោងអូសប្រមាណ៣០ម៉ែត្រ ទៅបុកនឹងថូផ្កានៅមុខផ្ទះរបស់ប្រជាពលរដ្ឋតែម្តង ។
សូមជម្រាបថា បន្ទាប់ពីកើតហេតុសមត្ថកិច្ចនគរបាលប៉ុស្តិ៍បឹងទំពុន២ សហការជាមួយនគរបាលចរាចរណ៍ខណ្ឌមានជ័យ និងអាជ្ញាធរសង្កាត់បឹងទំពុនទី២ ធ្វើការចុះពិនិត្យសាកសួរនិងវាស់វែងនៅទីតាំងកើតហេតុ ដោយមានទាំងរថយន្តសាមុយមកធ្វើសំណាកទៅលើសាកសពផងដែរ បន្ទាប់មកបានប្រគល់ឲ្យក្រុមគ្រួសារធ្វើបុណ្យតាមប្រពៃណី ៕
