ភ្នំពេញ ៖ បុរសម្នាក់ បានស្លាប់ភ្លាមៗ នៅកន្លែងកើតហេតុ ក្រោយពីជិះម៉ូតូលឿនពេក មិនប្រយ័ត្ន ទៅទាក់ដៃចង្កូត ជាមួយ ម៉ូតូកង់បីឥណ្ឌា ដួលខ្ទាតចូលក្រោមកង់រថយន្តស្ទូច កិន បែកក្បាលធ្លាយខួរ កាលពីល្ងាចថ្ងៃទី១១ ខែមេសា ឆ្នាំ២០២១ ស្ថិតនៅតាមបណ្ដោយផ្លូវ៣០ម៉ែត្រ ត្រង់ចំណុចទល់មុខបុរីសន្តិភាព២ ក្នុងសង្កាត់ចោមចៅ២ ខណ្ឌពោធិ៍សែនជ័យ រាជធានីភ្នំពេញ។
សពឈ្មោះ រិន ណារ៉ុងអាយុ ២៦ឆ្នាំ ទីកន្លែងកំណើត ឃុំទួលពេជ្រ ស្រុកអង្គស្នួល ខេត្តកណ្ដាល (មុខរបរកម្មកររោងចក្រ)។
បើតាមប្រភពព័ត៌មាននៅកន្លែងកើតហេតុ បានឱ្យដឹងថា នៅមុនពេលកើតហេតុគេឃើញកង់បីឥណ្ឌាមួយគ្រឿង មិនចាំផ្លាកលេខ បានធ្វើដំណើរតាមបណ្ដោយផ្លូវ៣០ម៉ែត្រ ក្នុងទិសដៅពីលិចទៅកើត ក្នុងល្បឿនល្មម ខណៈមកដល់ចំណុចកើតហេតុខាងលើ ស្រាប់តែមានម៉ូតូមួយគ្រឿងទៀត ម៉ាកហុងដាឌ្រីមសេ១២៥ ស៊េរីឆ្នាំ២០១៨ ពណ៌ខ្មៅ ពាក់ផ្លាកលេខ ភ្នំពេញ 1GS-0175 បើកបរដោយបុរសម្នាក់ ក្នុងល្បឿនលឿន បានវ៉ាជែងពីក្រោយកង់បីឥណ្ឌាក៏ទាក់ដៃចង្កូត បណ្ដាលឱ្យដួលបោកនឹងថ្នល់ខ្ទៀតចូលក្រោមកង់រថយន្តស្ទូច ពណ៌សលាយខៀវ ពាក់ផ្លាកលេខ កណ្តាល 3A-1319 ដែលធ្វើដំណើរតាមបណ្ដោយផ្លូវ៣០ម៉ែត្រ ក្នុងទិសដៅពីលិចទៅកើត ស្របទិសគ្នា ក្នុងល្បឿនលឿនចាប់ហ្វ្រាំងមិនទាន់ ក៏ជ្រុលកិនចំក្បាលបុរសម្នាក់ ស្លាប់ភ្លាមៗនៅនឹងកន្លែង។ រីឯម៉ូតូនិងរថយន្តវិញ រងការខូចខាតបន្តិចបន្តួចប៉ុណ្ណោះ។ ហើយភ្លាមនោះ តៃកុងរថយន្តស្ទូចបានរត់គេចខ្លួនបាត់ស្រមោល៕
