ថៃ៖ សត្វត្រកួតដ៏ធំមួយក្បាលប្រវែង ១.៨ម៉ែត្រ បានឆ្មក់ចូលទៅរកចំណីស៊ីនៅក្នុងហាង 7-Eleven ដែលមានទីតាំងស្ថិតក្នុងខេត្ដ Nakhon Pathom នៃប្រទេសថៃ បង្កការភ្ញាក់ផ្អើលយ៉ាងខ្លាំងដល់បុគ្គលិក និងអតិថិជន ។
ហេតុការណ៍ដ៏គួរឲ្យភ្ញាក់ផ្អើលខាងលើ ត្រូវគេថតបានកាលពីថ្ងៃអង្គារទី០៦ ខែមេសាកន្លងទៅ ដែលបង្ហាញឲ្យឃើញ សត្វល្មូនដ៏ធំនោះ ហាក់មានបំណងចង់បើកទ្វារទូរកញ្ចក់ តែដោយសារវាមិនអាចបើកបាន វាក៏ប្ដូរទិសដៅតោងឡើងធ្នើរទំនិញវិញម្ដង ដែលបណ្ដាលឲ្យទំនិញជាច្រើនធ្លាក់រប៉ាត់រប៉ាយពេញឥដ្ឋ ។
បើតាមសម្តីអតិថិជនម្នាក់បាននិយាយថា ៖ នៅពេលរូបគាត់ចូលក្នុងហាងដើម្បីទិញអាហារខ្លះ ហើយក៏បានឃើញសត្វត្រកួតយ៉ាងធំនោះនៅក្នុងហាងដែរ។ រូបគាត់ចង់ទិញភេជ្ជៈ ប៉ុន្ដែមិនអាចចូលទៅយកបានទេ ព្រោះវានៅក្បែរនោះខ្លាំងពេក ។ វាជាសត្វគ្រោះថ្នាក់ ជាពិសេសនៅពេលវាខឹង ដូច្នេះអតិថិជនរូបនេះបានត្រឹមឈរនៅខាងក្រោយ ហើយថតវាទុកក្នុងទូរសព្ទដៃរបស់ខ្ញុំ។
ភ្លាមៗនោះ ក្រោយទទួលបានព័ត៌ាមន ក្រុមអ្នកជួយសង្គ្រោះបានមកដល់ហាងនៅជាយក្រុងមួយនេះភ្លាម ហើយបានអូសសត្វត្រកួតចេញក្រៅ មុនយកវាទៅព្រលែងក្នុងព្រៃមួយកន្លែងដែលស្ថិតនៅក្បែរនោះវិញ ៕
