ភ្នំពេញ៖ បើតាមសេចក្ដីរាយការណ៍បឋមបានឲ្យដឹងថា នៅវេលាម៉ោងប្រមាណជិត៩យប់ ថ្ងៃទី០៦ ខែមេសា ឆ្នាំ២០២១នេះ មានករណីផ្ទុះអាវុធចំនួន៣គ្រាប់ នៅក្បែរស្ពានអាកាសផ្សារដីហុយ ស្ថិតក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ បណ្តាលឲ្យយុវជនម្នាក់ស្លាប់ភ្លាមៗនៅនឹងកន្លែងកើតហេតុ ។
ប្រភពព័ត៌មានពីកន្លែងកើតហេតុបានរាយការណ៍ថា នៅមុនពេលកើតហេតុគេឃើញ យុវជនមួយក្រុមដេញប្រតាយប្រតប់គ្នា ធ្វើឲ្យយុវជនម្នាក់ភ័យរត់ចូលកន្លែងដកលុយ ABA ខណៈនោះយុវជនម្នាក់ទៀតតាមមកដល់ ។ បន្ទប់មក សន្តិសុខABAនៅទីនោះធ្វើការហាមឃាត់មិនឲ្យចូល ប៉ុន្តែបែរជាបណ្តាលឲ្យយុវជនម្នាក់នោះខឹង ក៏ដកកាំបិតដើរសំដៅទៅសន្តិសុខនោះតែម្តង ។ ភ្លាមៗនោះសន្តិសុខនោះបានដកកាំភ្លើងបាញ់ចំនួន៣គ្រាប់ បណ្តាលឲ្យស្លាប់ភ្លាមៗនៅទីតាំងកន្លែងកើតហេតុ ។
ប៉ុន្តែទោះបីជាយ៉ាងណាក្តីសមត្ថកិច្ចនៅមិនទាន់បញ្ជាក់ឲ្យច្បាស់ពាក់ព័ន្ធនឹងការផ្ទុះអាវុធនេះនៅឡើយទេ។ ចំណែកជនសង្ស័យ ត្រូវសមត្ថកិច្ចឃាត់ខ្លួនដើម្បីអនុវត្តបន្តតាមនីតិវិធី ៕
