បរទេស៖ ប្រទេសស៊ីរី បានធ្លាក់ចូលទៅក្នុងសង្រ្គាមស៊ីវិល អូសបន្លាយ អស់រយៈពេល១ទសវត្សរ៍ ក្រោយពេលក្រុមប៉ះបោរ បានងើបឡើង ប្រឆាំងនឹងរបបគ្រប់គ្រងរបស់លោក បាសារ អាល់អាសាដ (Bashar al-Assad) ដោយបានបណ្ដាលឲ្យមនុស្ស៣៨៨ ០០០នាក់បាត់បង់ជីវិត និងជាង៦,៦លាននាក់រត់ភៀសខ្លួន ទៅរស់នៅប្រទេសនានា ហើយសង្គ្រាមហែកហួរជាតិសាសន៍ខ្លួនឯងនេះ បានធ្វើឲ្យប៉ះពាល់យ៉ាងធ្ងន់ដល់យុវជន។
សារព័ត៌មានជប៉ុន NHK បានផ្សាយ កាលពីថ្ងៃទី៦ ខែមេសា ឆ្នាំ២០២១ថា គណៈកម្មាធិការកាកបាទក្រហមអន្ដរជាតិ (ហៅកាត់ ICRC) បានចេញរបាយការណ៍ថ្មីមួយថា ខ្លួនបានរកឃើញការពិត ដែលប្រទេសស៊ីរីកំពុងតែប្រឈម ក្រោយពេលសង្រ្គាមអូសបន្លាយ អស់រយៈពេល១ទសវត្សរ៍កន្លងមកនេះ។ ICRC បានរកឃើញថា យុវជននៅក្នុងប្រទេសស៊ីរី កំពុងតែរងនូវការឈឺចាប់ ដោយសារតែជម្លោះហែកហួរ នៅក្នុងប្រទេសរបស់ខ្លួន។
អ្នកស្រី Mouna Shawat បានថ្លែង នៅក្នុងឃ្លីបវីដេអូមួយ ហើយចេញផ្សាយ ដោយ ICRC បានឲ្យដឹងថា «កាលពី១០ឆ្នាំ មុនពេលមានសង្គ្រាមផ្ទុះឡើង យើងមានអ្វីៗគ្រប់យ៉ាង ប៉ុន្ដែឥឡូវនេះយើងស្ថិតក្នុងស្ថានភាពដ៏លំបាក និងអត់ឃ្លាន ហើយជីវិតបានប្រែប្រួលខ្លាំងណាស់។ ស្រ្ដីជាម្តាយ អាយុ៣៣ឆ្នាំរូប មានកូនពីរនាក់ រស់នៅភាគខាងជើង នៃទីក្រុងអាឡិបប៉ូ (Aleppo) ដែលក្លាយជាតំបន់មានវិបត្តិមនុស្សធម៌ធ្ងន់ធ្ងរបំផុត នៅក្នុងអំឡុងពេលមានការវាយប្រហារគ្នា ឥតឈប់ឈរនេះ។
អ្នកស្រី Mouna Shawat បានបញ្ជាក់ថា សង្រ្គាមស៊ីវិល បានផ្ទុះឡើង ខណៈនាងមានអាយុជាង២០ឆ្នាំ។ នាងបានបាត់បង់ជើងម្ខាង នៅពេលគ្រាប់បែកផ្ទុះឡើង នៅតាមផ្លូវ កាលប៉ុន្មានឆ្នាំមុនេះ។
របាយការណ៍របស់គណៈកម្មាធិការកាកបាទក្រហមអន្ដរជាតិ (ហៅកាត់ ICRC) បានចេញផ្សាយ ស្របពេលខួប១០ឆ្នាំ នៃចលនាបាតុកម្ម ប្រឆាំងនឹងរបបរបស់ប្រធានាធិបតីស៊ីរី លោក បាសារ អាល់អាសាដ។ បើតាមការស្ទង់មតិ ប្រជាជនស៊ីរី ចំនួន ១ ៤០០នាក់ ដែលមានអាយុចន្លោះពី ១៨ ទៅ ២៥ ឆ្នាំ ដោយអ្នកខ្លះស្ថិតក្នុងប្រទេសនៅឡើយ ហើយអ្នកខ្លះទៀត នៅក្នុងលីបង់ និងអាល្លឺម៉ងង់។ ដូចគ្នានឹងអ្នកស្រី Mouna ដែរ គឺមានជិត៦០ភាគរយ នៃអ្នកឆ្លើយនឹងសំណួរ នៅក្នុងប្រទេសស៊ីរី បាននិយាយថា ពួកគេកំពុងពុះពារនឹងជំងឺធ្លាក់ទឹកចិត្ត កាលពីឆ្នាំកន្លងមក។
ដោយឡែកអង្គការឃ្លាំមើលសិទ្ធិមនុស្សស៊ីរី បានថ្លែងថា សង្គ្រាមស៊ីវិលនៅក្នុងប្រទេសស៊ីរី បានសម្លាប់មនុស្សជាង ៣៨៨ ០០០ នាក់ ហើយក្នុងនោះមានប្រហែល៣០ភាគរយ ជាជនស៊ីវិល។ ប៉ុន្ដែក្នុងចំណោមយុវជន ដែល ICRC បានស្ទង់មតិ នៅក្នុងប្រទេសស៊ីរី គឺ៤៧ភាគរយ បានបាត់បង់សមាជិកគ្រួសារ ឬមិត្តភក្តិជិតស្និទ្ធ នៅក្នុងជម្លោះនេះ។ លើសពីនេះទៅទៀត មានមនុស្ស៨៥ភាគរយ បានថ្លែងថា ពួកគេមិនមានទឹក និងអគ្គិសនីប្រើប្រាស់ទេ។
ជាមួយគ្នានេះដែរ អង្គការសហប្រជាជាតិ បានរាយការណ៍ថា ជម្លោះនៅក្នុងប្រទេសស៊ីរីនេះ បានបង្ខំឲ្យប្រជាពលរដ្ឋ ប្រហែល៦,៦លាននាក់ សែ្វងរកទីជម្រក នៅក្នុងប្រទេសជាច្រើន ហើយភាគច្រើន នៅក្នុងតំបន់មជ្ឈិមបូព៌ា ខណៈប្រជាពលរដ្ឋប្រហែល៦,៧លានាក់ផ្សេងទៀត កំពុងផ្លាស់ប្ដូរទីជម្រក នៅក្នុងប្រទេស។
លោក Khaled Fares បច្ចុប្បន្នកំពុងរស់នៅក្នុងខេត្ត Hatay នាភាគខាងត្បូង ប្រទេសតួកគី បានថ្លែងថា ផ្ទះរបស់គាត់ នៅក្នុងប្រទេសស៊ីរី បានរងការវាយប្រហារ តាមដែនអាកាស បណ្ដាលឲ្យខ្ទេចខ្ទីអស់។ គាត់នៅតែមានសុបិនឃើញហេតុការណ៍ដ៏អាក្រកក់នោះថា យន្ដហោះចម្បាំងបានមកវាយប្រហារ នាពេលយប់៕
