រដ្ឋធានីកូរ៉ូ៖ ប្រទេស Palau ស្ថិតនៅភាគខាងកើត ហ្វីលីពីន និងនៅតំបន់ប៉ាស៊ីហ្វីកខាងលិច បានផ្ដល់ទឹកដីរបស់ខ្លួនមួយផ្នែក សម្រាប់ធ្វើជាមូលដ្ឋានកងទ័ពអាមេរិក ដោយរួមទាំងកំពង់ផែ និងមូលដ្ឋានកងទ័ពអាកាស សម្រាប់ទប់ទល់នឹងឥទ្ធិពលរបស់ចិន។
បើតាមសារព័ត៌មាន Wall Street Journal បានរាយការណ៍ កាលពីដើមសប្ដាហ៍នេះថា ការផ្ដល់ទឹកដីសម្រាប់ធ្វើជាមូលដ្ឋានកងទ័ពដល់ប្រទេសមហាអំណាចលេខ១របស់ពិភពលោក ទាំងសេដ្ឋកិច្ច និងយោធានេះ បានកើតឡើង នៅក្នុងអំឡុងពេលលោក Mark Esper រដ្ឋមន្រ្ដីក្រសួងការពារជាតិអាមេរិក ទៅបំពេញទស្សនកិច្ចនៅលើប្រទេសដែនកោះមួយនេះ កាលពីសប្ដាហ៍មុន។ រីឯមូលដ្ឋានកងទ័ពអាមេរិក អាចនឹងបោះទីតាំងនៅលើកោះ Peleliu និង Angaur នៃសាធារណរដ្ឋ Palau ។ កងម៉ារីនអាមរិកក៏កំពុងតែបោសសម្អាតគ្រាប់មីន និងជួសជុលមូលដ្ឋានកងទ័ពអាកាសផងដែរ។
លោក Heino Klinck អនុរដ្ឋមន្រ្ដីក្រសួងការពារជាតិ Palau ប្រាប់អ្នកកាសែតថា៖ «រដ្ឋាភិបាល Palau មិនត្រឹមតែទទួលយកប៉ុណ្ណោះទេ ប៉ុន្តែថែមទាំងសាទរ អំពីកិច្ចប្រតិបត្តិការ សមយុទ្ធ និងការបណ្តុះបណ្តាល នៅ ជុំវិញតំបន់នានា នៃប្រទេស Palau ។
លោក Jeff Kingston នាយស្រាវជ្រាវ នៅសាកលវិទ្យាល័យ Temple បានថ្លែងថា ប្រទេស Palau បានអនុញ្ញាតឲ្យកងទ័ពអាមេរិកដាក់មូលដ្ឋានកងទ័ព ទាំងកំពង់ផែ និងមូលដ្ឋាកងទ័ពអាកាសបែបនេះ ក៏អាចដើម្បីទប់ទល់នឹងមហិច្ឆតារបស់ចិនផងដែរ។
ក្រោយពេលចិនអះអាងពីដែនទឹកសមុទ្រចិនខាងត្បូង ភាគច្រើនជាដែនអធិបតេយ្យរបស់ខ្លួន បានធ្វើឲ្យមានជម្លោះជាមួយនឹងបណ្ដាប្រទេស នៅក្នុងតំបន់អាស៊ាន រួមមាន ប្រ៊ុយណេ ម៉ាឡេស៊ី ហ្វីលីពីន និងវៀតណាម។ ជម្លោះដែនសមុទ្រចិនខាងត្បូងនេះ បានបង្កឲ្យមានភាពតានតឹងកាន់តែខ្លាំងឡើង រវាងប្រទេសចិន និងអាមេរិក។
ជាមួយគ្នានេះដែរ កាលពីពេលថ្មីៗនេះ ចិនបានបញ្ជូនកងទ័ពជើងទឹករបស់ខ្លួន ទៅធ្វើសមយុទ្ធយោធាបាញ់គ្រាប់ពិត នៅក្នុងដែនសមុទ្រនោះ។ ស្របគ្នានេះ អាមេរិកក៏បានបញ្ជូននាវាផ្ទុកយន្ដហោះរបស់ខ្លួនចំនួន២គ្រឿង ទៅធ្វើសមយុទ្ធដែរ ទើបធ្វើឲ្យស្ថានការណ៍កាន់តែតានតឹងឡើង។ ថ្វីបើចិនបានព្រមានដល់អាមេរិកមិនឲ្យធ្វើនាវាចរណ៍នៅលើតំបន់នោះក្ដី តែអាមេរិកបានអះអាងតបវិញថា នេះជាសេរីភាព ក្នុងការធ្វើនាវាចរណ៍របស់អាមេរិក ស្របតាមច្បាប់អន្ដរជាតិ។
ស្របពេលមហាអំណាចទាំង២កំពុងតែប្រជែងឥទ្ធិពល នៅក្នុងតំបន់នោះ តែឥណ្ឌូនេស៊ីជាប្រទេសដ៏ធំបំផុត នៅក្នុងតំបន់អាស៊ាន បានព្រមានដល់ចិន និងអាមេរិក មិនឲ្យអូសប្រទេសរបស់ខ្លួន ចូលទៅក្នុងជម្លោះនេះទេ។ រដ្ឋមន្រ្ដីការបរទេសឥណ្ឌូនេស៊ី បានអះអាងថា ទាំងអាស៊ាន និងឥណ្ឌូនេស៊ី ស្ថិតក្នុងភាពអព្យាក្រឹត និងជាដៃគូ។ ប៉ុន្ដែឥណ្ឌូនេស៊ី មិនជាប់ពាក់ព័ន្ធនឹងការប្រជែងឥទ្ធិពល រវាងប្រទេសមហាអំណាចទាំង២នេះឡើយ៕
