ជិះម៉ូតូគេចពីម៉ូតូកង់បី ជ្រុលទៅបុកគូទរថយន្តពេញទំហឹង បណ្តាលឲ្យរងរបួសធ្ងន់ម្នាក់ និងស្រាលម្នាក់

ភ្នំពេញ ៖ បុរសម្នាក់ បានរងរបួសធ្ងន់ នឹងម្នាក់ទៀតរងរបួសស្រាល ខណៈដែលជិះម៉ូតូឌុបគ្នា គេចពីម៉ូតូកង់បី ជ្រុលទៅបុកគូទរថយន្តសេរីទំនើបដែលចតដាក់អីវ៉ាន់ឲ្យភ្ញៀវចំពាក់កណ្តាលផ្លូវ បង្កការភ្ញាក់ផ្អើលកាលពីវេលាម៉ោង១៖២០រសៀល ថ្ងៃទី១៥ ខែវិច្ឆិកា ឆ្នាំ២០២១ ស្ថិតនៅតាមបណ្តោយផ្លូវ២០០៤ ក្នុងសង្កាត់កាកាបទី១ ខណ្ឌពោសែនជ័យ រាជធានីភ្នំពេញ។

តាមប្រភពព័ត៍មានពីកន្លែងកើតហេតុ បានឲ្យដឹងថា មុនពេលកើតហេតុ គេបានឃើញមានរថយន្តមួយគ្រឿង ម៉ាក FORD RANGER ពណ៌ស ពាក់ស្លាកលេខ ភ្នំពេញ 2BE-0069 បើកបរដោយបុរសម្នាក់ ធ្វើដំណើរក្នុងទិសដៅពីត្បូងទៅជើង លុះមកដល់ត្រង់ចំណុចកើតហេតុ បានបើកភ្លើងស៊ីញ៉ូចតរថយន្តចំពាក់កណ្ដាលផ្លូវ ដើម្បីដាក់អីវ៉ាន់ឲ្យភ្ញៀវ ស្រាប់តែមានម៉ូតូមួយគ្រឿង ម៉ាកសងសេ125 ពណ៌ខ្មៅ ពាក់ស្លាកលេខ កណ្តាល 1M-3770 បើកបរដោយបុរសម្នាក់ នឹងរួមដំណើរដោយបុរសម្នាក់ទៀត ធ្វើដំណើរស្របទិសគ្នា រួចបានជិះគេចពីម៉ូតូកង់បីដែលនៅខាងមុខ ក៏ជ្រុលទៅបុកគូទរថយន្តពេញទំហឹង បណ្តាលឲ្យដួលរងរបួសធ្ងន់ម្នាក់ នឹងម្នាក់ទៀតរងរបួសស្រាល ត្រូវបានប្រជាពលរដ្ឋទំនាក់ទំនងហៅរថយន្តសាម៉ុយដឹកយកទៅសង្គ្រោះភ្លាមៗ ចំណែកម៉ូតូរងការខូតខាតយ៉ាងដំណំ។