ព្រះសីហនុ៖ មានករណីគ្រោះថ្នាក់ចរាចរណ៍ដ៏រន្ធត់មួយបានឆក់យកជីវិតនារីវ័យក្មេង២នាក់នៅនឹងកន្លែងកើតហេតុភ្លាមៗយ៉ាងអាណោចអាធ័ម និងម្នាក់ទៀតរងរបួស កាលពីវេលាម៉ោង ៤ និង៤៥នាទីល្ងាច ថ្ងៃទី១៣ ខែកក្កដា ឆ្នាំ២០២១ លើផ្លូវជាតិលេខ៤ចន្លោះគីឡូម៉ែត្រលេខ ២១១-២១២ ស្ថិតក្នុងភូមិចំណោទរាម ឃុំបិតត្រាង ស្រុកព្រៃនប់ ខេត្តព្រះសីហនុ ។
សមត្ថកិច្ចស្រុកព្រៃនប់ អោយដឹងថា គ្រោះថ្នាក់ចរាចរណ៍នេះ បានកើតឡើងបង្កដោយរថយន្ត ០១គ្រឿងម៉ាក HYUNDAI ពណ៌ទឹកស ពាក់ផ្លាកលេខ កំពង់ស្ពឺ 3AL-1436 ដែលមានទិសដៅពីខេត្តព្រះសីហនុ ឆ្ពោះទៅភ្នំពេញ មិនស្គាល់អត្តសញ្ញាណអ្នកបើកបរ ។ លុះមកដល់ចំណុចខាងលើ បានកៀរម៉ូតូ ០១គ្រឿង ម៉ាក SCOOPY ពាក់ផ្លាកលេខ ព្រះសីហនុ 1F-8299 ពណ៌ស បើកបរដោយឈ្មោះ ម៉ៅ រ៉ូគីយាស់ ភេទស្រី អាយុ ១៨ឆ្នាំ ទីលំនៅបច្ចុប្បន្ន ភូមិអណ្ដូងថ្ម ឃុំអណ្ដូងថ្ម ស្រុកព្រៃនប់ ខេត្តព្រះសីហនុ ដែលមានទិសដៅស្របគ្នា។
ចំពោះករណីគ្រោះថ្នាក់នេះបណ្តាលឲ្យមនុស្សស្លាប់ និងអ្នករបួសចំនួន៣នាក់រួមមានទី១- ឈ្មោះ ម៉ៅ រ៉ូគីយាស់អ្នកបើកបរម៉ូតូ បានស្លាប់ ទី២-ឈ្មោះ ចាន់ លីណា ភេទស្រី អាយុ ១៨ ឆ្នាំ អ្នករួមដំណើរម៉ូតូ បានស្លាប់បាត់បង់ជីវិត និងទី៣-ឈ្មោះ ឡាយ ណៃយ៉ីម ភេទស្រី អាយុ ៤១ឆ្នាំ របួសមធ្យម ។
បន្ទាប់ជួបហេតុការណ៍នេះភ្លាមរថយន្តខាងលើបានបន្តបើកគេចខ្លួន តាមផ្លូវជាតិលេខ៣ សំដៅទៅកំពត ហើយសមត្ថកិច្ច បានប្រើប្រាស់រថយន្តជាច្រើនគ្រឿង ដេញទាន់តែអ្នកបើកបររថយន្ត នៅបន្តបើករត់ មិនប្រគល់ខ្លួន តែដោយសមត្ថកិច្ចដេញព័ទ្ធយ៉ាងប្រកៀក អ្នកបើកបរបង្ខំចិត្តឈប់រថយន្តលោតចេញគេចខ្លួន ទៅបាត់តែម្តង។ ចំណែកសពសមត្ថកិច្ចបានធ្វើកំណត់ហេតុប្រគល់ជូនក្រុមគ្រួសារ ដើម្បីយកធ្វើបុណ្យតាមប្រពៃណី និងជនរងគ្រោះ បានបញ្ជូនទៅព្យាបាលនៅមន្ទីរពេទ្យ 888 ខេត្តព្រះសីហនុ។ រីឯវត្ថុតាង បានយកមករក្សាទុក នៅអធិការដ្ឋាននគរបាលស្រុកព្រៃនប់ ដើម្បីដោះស្រាយនៅពេលក្រោយ ៕
