ភ្នំពេញ ៖ ប្រព័ន្ធប្រឡាយលូ ការពារទឹកជំនន់ ក្នុងរាជធានីភ្នំពេញ ដែលជាជំហានទី៤ ក្នុងគម្រោងរបស់ JICA មានតម្លៃជាង ៣៦លានដុល្លារ ជាជំនួយឥតសំណងរបស់រដ្ឋាភិបាលជប៉ុន ធ្វើអោយប្រជាពលរដ្ឋខ្មែរជាច្រើននាក់ ជាពិសេសអ្នកនិយមលេងនៅលើបណ្តាញសង្គមហ្វេសប៊ុក មានការកោតសរសើរថា ពិតជាអស្ចារ្យមែន! លូធំ មានស្តង់ដា ហើយស្អាត មនុស្សអាចដើរបានទៀតផង ។
បើតាមមន្ត្រីជំនាញគិតត្រឹមថ្ងៃទី១៣ ខែកក្កដា ឆ្នាំ២០២១ ចំពោះគម្រោងការពារទឹកជំនន់ និងកែលំអប្រឡាយលូបានឈានដល់ជំហានទី៤ ស្ថិតក្នុងភូមិសាស្ត្រខណ្ឌដូនពេញ ក្រោមជំនួយឥតសំណងរបស់ប្រទេសជប៉ុន ដែលគម្រោងសម្រេចលទ្ឋផលបាន ៩៨% ហើយគ្រោងនឹងដាក់អោយដំណើរការជាបណ្តោះអាសន្ន ចាប់ពីថ្ងៃទី១៦ ខែកក្កដា ឆ្នាំ២០២១នេះ តទៅ ។
គម្រោងបាននិងអនុវត្តការដាក់លូមេ ជាលូមូល និងលូប្រអប់ខ្នាតធំ ដែលមានទំហំចាប់ពីអង្កត់ផ្ចិត ១.៥ម៉ែត្រ ដល់ ២.៣ម៉ែត្រ សាងសង់អាងក្រោមដី ដែលស្តុកទឹកបាន ៦៥,០០០ម៉ែត្រគូប មានទំហំបណ្តោយ ១៣៥ម៉ែត្រ ទទឹង ១៣ម៉ែត្រ ជម្រៅ ៤ម៉ែត្រ និងសាងសង់ស្ថានីយ៍បូមទឹកថ្មី មានសមត្ថភាពបូមទឹក ១.៤ម៉ែត្រគូប ក្នុង១វិនាទី ។
សូមជម្រាបថា ពាក់ព័ន្ធនឹងគម្រោងខាងលើនេះបានបើកការដ្ឋានសាងសង់ តាំងពីនៅថ្ងៃទី០៤ ខែមីនា ឆ្នាំ២០១៩ ដោយកាលពីថ្ងៃទី៣ ខែមិថុនា កន្លងមកនេះ ម៉ាស៊ីនមេកានិច ដែលមានមុខងារស្ទាក់កាយ និងប្រមូលសំរាមស្វ័យប្រវត្តិទី៤ ដែលជាផ្នែកមួយនៃគម្រោង ក៏ត្រូវបានប្រកាសដាក់ឱ្យដំណើរការហើយដែរ ។ រហូតដល់ពេលនេះម៉ាស៊ីនប្រមូលសម្រាមចំនួន ៤កន្លែង ក្នុងចំណោម ៥កន្លែង ត្រូវបានដាក់ឲ្យដំណើរការហើយ ដែលអាចជួយកាត់បន្ថយទឹកជន់លិចនៅតំបន់មុខព្រះបរមរាជវាំង ផ្សារកណ្តាល ផ្សារថ្មី វាលមេរុហ៍ផ្លូវលេខ១៩ ផ្លូវលេខ១៥៤ ផ្លូវលេខ១៤៤ ផ្លូវលេខ១៣ និងមួយផ្នែកនៃភាគខាងកើត និងខាងត្បូងវត្តភ្នំ រួមមានផ្លូវលេខ៤៧ ផ្លូវលេខ៩០ ផ្លូវលេខ៩២ ។
បើទោះបីយ៉ាងណាក្តីការដាក់ឲ្យដំណើរការម៉ាស៊ីនថ្មីនេះ នឹងជួយធ្វើឲ្យប្រព័ន្ធលូ នៅក្នុងទីក្រុងល្អប្រសើរជាងមុន ផ្តល់សុវត្ថិភាពដល់ក្រុមការងារ ព្រមទាំងការពារបរិស្ថានទឹក ដោយការយកសំរាមចេញពីប្រព័ន្ធលូជាដើម ៕
