បន្ទាយមានជ័យ៖ ស្ត្រីវ័យចំណាស់ម្នាក់អាយុ៨៨ឆ្នាំ ខណៈដែលកំពុងដើរតាមផ្លូវជាតិស្រាប់រថយន្តរថយន្តមួយគ្រឿងបានបុកបណ្តាលឲ្យស្លាប់ភ្លាមៗយ៉ាងអាណោចអាធ័មនៅវេលាម៉ោង៥ព្រឹក ថ្ងៃទី២៤ ខែមិថុនា ឆ្នាំ២០២១ នៅលើកំណាត់ផ្លូវជាតិលេខ៥៨ ចន្លោះបង្គោលគីឡូម៉ែត្រលេខ៣៧៦-៣៧៧ ក្នុងភូមិសូរិយា ឃុំកូប ស្រុកអូរជ្រៅ ខេត្តបន្ទាយមានជ័យ ។
បើតាមនគរបាលស្រុកអូរជ្រៅ បានឲ្យដឹងថា ជនរងគ្រោះមានឈ្មោះ កុយ យ៉ង់ អាយុ ៨៨ឆ្នាំ រស់នៅភូមិនិមិត្ត១ សង្កាត់និមិត្ត ក្រុងប៉ោយប៉ែត ខេត្តបន្ទាយមានជ័យ។ មុនពេលកើតហេតុជនរងគ្រោះបានដើរនៅលើទ្រូងផ្លូវជាតិលេខ៥៨ ពីលិចទៅកើត ពេលដើរដល់ចំណុចកើតហេតុស្របពេលនោះមានរថយន្ត១គ្រឿងម៉ាកតូយូតា ពណ៌ស មិនចាំស្លាកលេខ បើកស្របទិសគ្នាស្រាប់តែទៅបុកជនរងគ្រោះពីក្រោយពេញទំហឹងបណ្តាលឱ្យស្លាប់ភ្លាមៗមួយរំពេចនៅនឹងកន្លែង។
ចំណែកកូនជនរងគ្រោះបានឲ្យដឹងថា ម្តាយរបស់គាត់មានវ័យចំណាស់ហើយ និងមានស្មារតីវង្វេង ។ ពេលបាត់រូបគាត់ ពួកកូនចៅបាននាំគ្នាដើររកដែរតែរកមិនឃើញ ទើបនៅព្រឹកឡើងដឹងថា ម្តាយជួបគ្រោះថ្នាក់ចរាចរណ៍ស្លាប់ ចំណែករថយន្តបុកបានបើករត់គេចខ្លួនបាត់។
បើទោះបីយ៉ាងណាក្តីរហូតដល់ពេលនេះសមត្ថកិច្ចកំពុងធ្វើការស្រាវជ្រាវយ៉ាងយកចិត្តទុកដាក់ដើម្បីតាមចាប់រថយន្តបង្កយកមកអនុវត្តតាមនីតិវិធី ។ ដោយឡែកសពជនរងគ្រោះត្រូវបានប្រគល់ជូនក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕
