ភ្នំពេញ៖ ប្រិយមិត្តមួយចំនួនដែលចូលចិត្តទស្សនាខ្សែរភាពយន្ត បទចម្រៀងជាដើម ប្រាកដជាធ្លាប់បានស្គាល់ និងបានឃើញហើយ ពីភាពលេចធ្លោរបស់តាតារាសម្តែង ធី រ៉ាវាត់ តាមរយៈការសម្តែងភាពយន្តជាច្រើន តួអង្គសម្តែងក្នុងបទចម្រៀងកាយវិការ(MV) និងតាមរយៈសកម្មភាពសិល្បៈមួយចំនួនទៀត ។ មិនតែបុណ្ណោះ ក្រៅពីប្រឡូកខ្លួនក្នុងវិថីសិល្បៈ លោក ធី រ៉ាវាត់ ក៏មាននូវហាងសាឡន និងអាជីកម្មជាច្រើនទៀតនៅក្នុងដៃផងដែរ ។ ប៉ុន្តែ រឿងរ៉ាវនៅពីក្រោយនៃភាពជោគជ័យក្នុងជីវិតយ៉ាងត្រចះត្រចង់របស់តារារូបនេះ ប្រហែលជាប្រមិត្តមួយចំនួននៅមិនទាន់ដឹងនៅឡើយនោះទេ ។
បើតាមការជម្រាបដោយផ្ទាល់ពីលោក ធី រ៉ាវាត់ បានឲ្យដឹងថា សមិទ្ធផលនៃភាពជោគជ័យ ដែលរូបលោកទទួលបាននាពេលបច្ចុប្បន្នទាំងអស់នេះ គឺលោកបានហែលឆ្លងកាត់នូវភាពល្វីងជូចត់ និងឧបសគ្គក្នុងជីវិតច្រើនខ្លាំងណាស់ ដោយសាតែរូបលោក ជាកូនកំព្រាគ្មានប៉ា ម៉ាក់(អណាព្យាល) ដូចគេងឯងផង ។ ជីវិតរបស់លោកនាពេលកន្លងមក ធ្លាប់ទទួលបាននូវការពេបជ្រាយពីអ្នកដទៃ ការរិះគន់ និងការមិនឲ្យតម្លៃពីអ្នកដទៃជាដើម ។
បើទោះបីយ៉ាងណាក្តីតារាសម្តែង ធី រ៉ាវាត់ បានតស៊ូអត់ធ្មត់នូវរាល់ទង្វើមិនល្អពីអ្នកដទៃទាំងអស់នោះ និងជំនះនូវរាល់ភាពលំបាក់គ្រប់បែបយ៉ាងដើម្បីអនាគតភ្លឺស្វាងរបស់ខ្លួន ។ ជាក់ស្តែងមុននឹងរូបលោកទទួលបានអាជីបជាច្រើនក្នុងដៃដូចសព្វថ្ងៃ ធី រ៉ាវាត់ធ្លាប់បានទៅសិក្សាជំនាញសម្អាង សាឡន នៅប្រទេសថៃអស់រយៈពេលជាច្រើនឆ្នាំ ។ លុះលោកទទួលបានជំនាញច្បាស់លាស់ហើយ លោកបានវិលត្រឡប់មកកម្ពុជាវិញ ដើម្បីប្រកបអាជីវកម្មខ្លួនឯងរហូតទទួលបានភាពរីកចម្រើនជាបន្តបន្ទាប់ ។
សូមជម្រាបថា ចំពោះការប្រឡូកក្នុងអាជីព នៅហាងសាឡន ធី រ៉ាវាត់ធ្លាប់ទទួលតុបតែងសម្អាង និងផាត់មុខ ឲ្យតារាល្បីៗជាច្រើន ។ ពិសេសជាងនេះទៅទៀតនោះ គេសង្កេតឃើញថា លោក ធី រ៉ាវាត់ អញ្ជើញឲ្យទៅជួយផាត់មុខជូនលោកជំទាវមួយចំនួន ដើម្បីអញ្ជើញចូលរួមក្នុងកម្មវិធីធំៗជាច្រើនទៀតផង ៕
