ភ្នំពេញ ៖ យុវជនរងគ្រោះទី១មានឈ្មោះ សៀង ឌី ភេទប្រុស អាយុ១៧ឆ្នាំ ជនជាតិខ្មែរ មុខរបរសិស្ស រស់នៅជិតស្ពានអាកាសចោមចៅក្នុងសង្កាត់ចោមចៅទី៣ ខណ្ឌពោធិ៍សែនជ័យ។យុវជនរងគ្រោះទី២មានឈ្មោះ ទូច កុសល ភេទប្រុស អាយុ២០ឆ្នាំ ជនជាតិខ្មែរ មុខរបររត់ឡំប្រឺតានៅក្រុងព្រះសីហនុ។កាលពី ថ្ងៃ ទី១៣ ខែធ្នូ ឆ្នាំ២០២១ ក្មេងទំនើងមួយក្រុមមានគ្នាជិត២០នាក់ជិះម៉ូតូជិត ១០គ្រឿងបានដេញវាយយុវជនពីរនាក់បណ្ដាលឱ្យជនរងគ្រោះភ័យស្លន់ស្លោ ក៏ផ្តួលម៉ូតូចោលរត់ឱ្យគេជួយ ហើយក្រុមក្មេងទំនើងបានកាច់យកស្លាកលេខម៉ូតូ តែមិនបានសម្រេច បង្កឱ្យមានការភ្ញាក់ផ្អើលដល់សមត្ថកិច្ចចុះធ្វើអន្តរាគមន៍ នៅចំណុចមុខការាសសាំងសូគីម៉ិច តាមបណ្តោយផ្លូវភ្នំពេញ-ហាណូយក្នុងសង្កាត់ទឹកថ្លា ខណ្ឌសែនសុខ រាជធានីភ្នំពេញ។មុនកើតហេតុរូបគេជិះម៉ូតូនិចមួយគ្រឿងពណ៌ស ពាក់ស្លាកលេខ ភ្នំពេញ1FV-5820ទើបនឹងចេញមកពីលេងបាល់ ក្នុងគោលបំណងត្រឡប់ទៅកន្លែងស្នាក់នៅម្ដុំស្ពានអាកាសចោមចៅ ដោយធ្វើដំណើរតាមបណ្តោយផ្លូវភ្នំពេញហាណូយ ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើ ស្រាប់តែលេចមុខក្មេងទំនើងមួយ ក្រុមជិះម៉ូតូជិត១០គ្រឿងប្រដាប់ដោយខ្សែក្រវាត់ដំបង និងដាវបានជិះដេញវាយរូបគេ ធ្វើឱ្យរូបគេភ័យស្លន់ស្លោក៏ផ្តួលម៉ូតូរត់យករួចខ្លួនហើយស្រែកឱ្យគេជួយ។ ភ្លាមនោះក្រុមក្មេងទំនើងបានកាច់ស្លាកលេខម៉ូតូរបស់ខ្លួនតែមិនបានសម្រេចទើបបង្កឱ្យមានការភ្ញាក់ផ្អើល រួចក្រុមក្មេងទំនើងទាំងនោះបាននាំគ្នាជិះម៉ូតូគេចខ្លួនបាត់អស់ទៅ ៕
