ភ្នំពេញ៖ នារីវ័យក្មេង៣នាក់បានស្លាប់ជាបន្តបន្ទាប់ ដោយម្នាក់ស្លាប់នៅពេលទៅស្រុកកំណើត និង នារី២នាក់ទៀតដេកស្លាប់ក្នុងបន្ទប់ជួល ទល់មុខផ្សារទំនើបអ៊ីអន១ នៅចំណុចផ្ទះជួលលេខ២៦ ផ្លូវសុធារស ក្រុម៤៤ ភូមិ៨ សង្កាត់ទន្លេបាសាក់ ខណ្ឌចំការមន បង្កការភ្ញាក់ផ្អើលនៅរសៀលថ្ងៃទី០២ ខែកញ្ញា ឆ្នាំ២០២១នេះ ។
យោងតាមមិត្តភក្តិនារីរងគ្រោះទាំង៣នាក់ បានបង្ហើបឲ្យដឹងថា នារីរងគ្រោះទី១-ឈ្មោះថា អាផៃ ទី២-ឈ្មោះអាកា និង ទី៣-ឈ្មោះអាវី ដែលស្លាប់ក្នុងបន្ទប់ជួលនៅកន្លែងកើតហេតុផង ។
មុនពេលស្លាប់១ថ្ងៃ គឺនៅថ្ងៃទី០១ ខែកញ្ញា ឆ្នាំ២០២១ នារីរងគ្រោះឈ្មោះ អាផៃ មានអាការៈមិនស្រួលខ្លួន ក៏ទៅផ្ទះនៅស្រុកកំណើតត្រើយម្ខាង និងទៅរកទិញថ្នាំ រួចបានផ្តាំមកប្រភពជាមិត្តភ័ក្រឲ្យទៅជួយមើលថែនារីរងគ្រោះអាកានិងអាវី និងឲ្យនាំទៅពិនិត្យនៅមន្ទីរពេទ្យផង ។
លុះមកដល់ថ្ងៃកើតហេតុរំលងមួយថ្ងៃ ដោយទទួលបានដំណឹងថា អាផៃ បានស្លាប់ លុះមកបន្ទប់នារីរងគ្រោះ២នាក់ទៀត ស្រាប់តែឃើញម្នាក់ស្លាប់បែកពពុះមាត់និងម្នាក់ស្លាប់ធម្មតា ទើបបង្ករភ្ញាក់ផ្អើលដល់ប្រជាពលរដ្ឋនិងសមត្ថកិច្ចតែម្តង។
ក្រោយកើតហេតុ សមត្ថកិច្ចជំនាញបានចុះពិនិត្យសពនារីរងគ្រោះ ដើម្បីរកមូលហេតុនៃការស្លាប់របស់នារីរងគ្រោះ ដើម្បីមានចំណាត់ការតាមនីតិវិធីបន្ត៕
