ភ្នំពេញ៖ បន្ទាប់ពីអតីតស្ដេចប្រដាល់គុនខ្មែរ លោក អេ ភូថង សម្រាកព្យាបាលជាង៣សប្ដាហ៍ពេល នេះបានជាសះស្បើយពីជំងឺកូវីដ-១៩ និងបានត្រឡប់ទៅធ្វើចត្ដាឡីស័កនៅផ្ទះតាមការណែនាំរបស់ក្រសួងសុខាភិបាលវិញដោយលោកលើកឡើងថា ប្រសិនបើលោកគ្មានវ៉ាក់សាំងសម្ដេចតេជោជួយទេ លោកប្រហែលស្លាប់បាត់ទៅហើយ ។
អតីតស្ដេចប្រដាល់គុនខ្មែររូបនេះបានអះអាងបន្ថែមថា កត្ដាសំខាន់ ដែលរួមចំណែកធ្វើឲ្យខ្ញុំបានជាសះស្បើយ ទី១-ប្រពន្ធ កូនៗ រួមទាំងកូនសិស្សខ្ញុំបានផ្ដល់កម្លាំងចិត្តឲ្យខ្ញុំ ទី២-ខ្ញុំសូមអរគុណក្រុមគ្រូពេទ្យនៅទីនោះ គាត់មើលថែខ្ញុំបានល្អ និងផ្ដល់កម្លាំងចិត្តដល់ខ្ញុំ ។ ទី៣-មានបងប្អូនអ្នកគាំទ្រច្រើន គាត់បានសួរសុខទុក្ខ និងឧបត្ថម្ភថវិកា ដើម្បីទិញអាហារ ខ្ញុំអរគុណពួកគាត់ច្រើនមែនទែន ពិសេសឯកឧត្តម ហ៊ុន ម៉ាណែត និងលោកជំទាវ ដែលបានឧបត្ថម្ភថវិកាផ្ទាល់ខ្លួន ក៏ដូចជាសប្បុរសជនមួយ ចំនួនទៀត។
លោកបានបញ្ជាក់ថា «ប៉ុន្ដែអ្វីដែលពិសេសមែនទែន គឺសម្ដេចតេជោនាយករដ្ឋមន្ដ្រី និងសម្ដេចកិត្តិព្រឹទ្ធបណ្ឌិត ដែលពេលនោះ បើខ្ញុំអត់បានចាក់វ៉ាក់សាំងរបស់សម្ដេច ខ្ញុំក៏ប្រហែលមិនបានរស់ដែរ ។ដោយសារខ្ញុំបានចាក់វ៉ាក់សាំង ២ដង ដើម្បីប្រយុទ្ធប្រឆាំងជាមួយជំងឺមួយនេះបើទោះបីខ្ញុំឆ្លងប៉ុន្តែមិនធ្ងន់ធ្ងរដល់អាយុជីវិតនោះទេ ដោយវាបានជួយកាត់បន្ថយពាក់កណ្ដាល ។ មែនទែនទៅ បើសិនខ្ញុំគ្មានវ៉ាក់សាំងរបស់សម្ដេចទេ ខ្ញុំស្លាប់បាត់ហើយ ។ ខ្ញុំពិតជាអរគុណសម្ដេចខ្លាំងណាស់»។
សូមជម្រាបថា លោក អេ ភូថង បានធ្វើតេស្ដវិជ្ជមានកូវីដ-១៩ កាលពីថ្ងៃទី១១ ខែកក្កដា ហើយបានសម្រាកព្យាបាលនៅមណ្ឌលពហុកីឡដ្ឋានជាតិ ។ ដោយសារលោកមានជំងឺប្រចាំកាយច្រើន ទើបធ្វើឲ្យជំងឺមានការវិវត្ដន៍លឿនរហូតប្រើប្រាស់អុកស៊ីសែនហើយត្រូវបានក្រុមគ្រូពេទ្យយកចិត្តទុកដាក់ ព្យាបាលរួមផ្សំនឹងលោកមានវ៉ាក់សាំងការពារជំងឺកូវីដផងទើបបានជាសះស្បើយ និងត្រូវបានអនុញ្ញាតឲ្យចេញទៅផ្ទះកាលពីថ្ងៃទី០៣ ខែសីហា ឆ្នាំ២០២១ ៕
