ភ្នំពេញ ៖ ជនសង្ស័យម្នាក់ ប្រដាប់ដោយកាំបិត បានធ្វើសកម្មភាពប្លន់យកម៉ូតូពីបុរសម្នាក់ បានសម្រេច មិនរំខានដល់សមត្ថកិច្ច។ ហេតុការណ៍នេះកើតឡើងកាលពីម៉ោង៧ព្រឹក ថ្ងៃទី១៩ ខែមីនា ឆ្នាំ២០២១ ស្ថិតនៅស្រះទឹកក្បែរអគ្គិសនី ក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
តាមប្រភពព័ត៌មានពីជនរងគ្រោះសុំមិនបញ្ចេញឈ្មោះ បានឲ្យដឹងថា មុនពេលកើតហេតុ រូបគាត់បានជិះម៉ូតូមួយគ្រឿង ម៉ាកស្មាស់វី ពណ៌ខ្មៅ ពាក់ស្លាកលេខ ភ្នំពេញ 1BI 0383 ដើម្បីទៅមើលមីង ខណៈទៅដល់ចំណុចកើតហេតុ មិនទាន់បានមើលមងផង ស្រាប់តែលិចមុខជនសង្ស័យម្នាក់ ប្រដាប់ដោយកូនកាំបិតមុតស្រួចមកភ្ជង់ពីក្រោយគម្រាមប្លន់យកម៉ូតូតែម្តង ភ្លាមៗនោះ ជនរងគ្រោះព្យាយាមស្រែកឲ្យគេជួយដែរ តែដោយសារនៅទីនោះគ្មានមនុស្ស និងជាតំបន់ស្ងាត់ផង ទើបជនសង្ស័យងាយធ្វើសកម្មភាព និងជិះចេញដោយសុវត្តិភាពដោយមិនរំខានដល់សមត្ថកិច្ច។
ក្រោយកើតហេតុ ជនរងគ្រោះបានត្រឹមទៅដាក់ពាក្យបណ្តឹងនៅប៉ុស្តិ៍នគរបាលរដ្ឋបាលចោមចៅទី១ ដើម្បីសុំការអន្តរាគមន៍ពីសមត្ថកិច្ចស្វែងរកម៉ូតូ និងចាប់ជនសង្ស័យយកមកដាក់ទោសតាមច្បាប់៕
