ភ្នំពេញ៖ ពិតជាមិនមែនរឿងធម្មតានោះឡើយ ក្រុមឧក្រិដ្ឋជនទាំង០៤នាក់ដែល បានចូលជំរិតនិងប្លន់ក្នុងបុរីអង្គរភ្នំពេញ នៅខណ្ឌសែនសុខ រាជធានីភ្នំពេញកាល
ពីវេលាម៉ោង១១និង០០នាទី ថ្ងៃទី០១ ខែមីនា ឆ្នាំ២០២១ ម្សិលម៉ិញនេះ មានគម្រោង ផែនការ ចាប់ជំរិតទាប្រាក់ហើយ សម្លាប់ទាំងគ្រួសារតែម្តង ប៉ុន្តែផែនការ នេះត្រូវ កម្លាំង អាវុធហត្ថក្តាប់បាន ។
បើតាមប្រភពមួយបានដឹងថា ផែនការរបស់ក្រុមក្រុមឧក្រិដ្ឋជនទាំងនោះ គ្រោង ធ្វើសកម្មភាពបីដងរួចមកហើយ តាំងពីថ្ងៃទី២៥ ដល់ថ្ងៃទី២៨ ខែកុម្ភៈ ប៉ុន្តែការ ជួបជុំ និងពេលវេលាហាក់មិនអំណោយផល់ពួកគេ ទើបបណ្តាលឲ្យរំសាយគម្រោង ម្តងហើយម្តងទៀត ។ លុះថ្ងៃកើតហេតុខាងលើ ទើបក្រុមឧក្រិដ្ឋជនទាំងនោះ មាន ឱកាសចូលធ្វើសកម្មភាព ។
ប្រភពដដែលឲ្យដឹងបន្តថា ក្រុមឧក្រិដ្ឋជនទាំង០៤នាក់នោះ មានឈ្មោះ អ៊ឹម សុវណ្ណារិទ្ធ ជាមេក្លោងផ្តួចផ្តើមគំនិត ដែលធ្លាប់ជាអ្នកបើកឡានឲ្យម្ចាស់ផ្ទះ ហើយក៏បានឈប់មួយរយៈ បន្ទាប់មកក៏សុំម្ចាស់ផ្ទះចូលធ្វើការវិញ តែម្ចាស់ផ្ទះមិនព្រមឆ្លើយតប រូបគេក៏បានរៀបចំផែនការ ចូលចាប់ជំរិតនិងប្លន់សម្លាប់តែម្តង ។
បើតាមការគ្រោងទុករបស់ក្រុមឧក្រិដ្ឋជនដំបូងគឺប្រមូលគ្នីគ្នាចូលទៅក្នុងផ្ទះ ភ្ជង់ម្ចាស់ផ្ទះឲ្យសសេរសែក នូវសាច់ប្រាក់១លានដុល្លារ បន្ទាប់មកនឹងចាប់កូនស្រីតូច របស់ម្ចាស់ផ្ទះម្នាក់ឡើងឡាន ទៅធនាគារ ដោយឲ្យគ្នាគេចុះដកលុយ និងគំរាមឲ្យម្ចាស់ផ្ទះចាំឆ្លើយទូរស័ព្ទជាមួយបុគ្គលិកធនាគារ ឲ្យពួកគេដកលុយចុះ។ ផែនការបន្ទាប់ ក្រោយពីដកលុយបាន ពួកវានឹងសម្លាប់ម្ចាស់ផ្ទះទាំង២នាក់ប្តីប្រពន្ធ ព្រមទាំងកូនៗ០៦នាក់ និងអ្នកបម្រើ០២នាក់ សរុប១០នាក់ ប្លន់យកលុយនិងគ្រឿងអលង្ការ ដែលមានក្នុងទូរដែកទាំងអស់ បន្ទាប់មកវេចខ្ចប់សាកសពដាក់ចូលឡានម្ចាស់ផ្ទះ០២គ្រឿង ហើយបើកយកសពទៅបោះចោលនៅពេជ្រនិល។ រីឯអ្នកចូលធនាគារដកលុយ ត្រូវគេចខ្លួនទៅប្រទេសថៃ ឯអ្នកដ៏ទៃគឺមិនបាច់រត់ទៅណាទេ។ គម្រោងរបស់មេក្លោង ក្រោយពេលប្លន់បានសម្រេច នឹងទិញឡាន Luxis Kuro 570 មួយគ្រឿង រួចដណ្តឹងប្រពន្ធរៀបការ ។
ពាក់ព័ន្ធនឹងករណីនេះ ក្រោយកម្លាំងអាវុធហត្ថក្តាប់បាននូវផែនការរបស់ក្រុមឧក្រិដ្ឋជននេះហើយ បានរៀបចំគម្រោងផែនការឲ្យក្រុមនេះចូលអន្ទាក់របស់កម្លាំងអាវុធហត្ថវិញ ដែលដឹកនាំដោយលោកឧត្តមសេនីយ៍ឯក រ័ត្ន ស្រ៊ាង ក្រោមការបញ្ជាផ្ទាល់ពីនាយឧត្តមសេនីយ៍ សៅ សុខា អគ្គមេបញ្ជាការរង នៃកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បណ្តាលឲ្យក្រុមឧក្រិដ្ឋជនទាំង០៤នាក់ ស្លាប់នៅនឹងកន្លែង ។
ក្រោយពេលប្រតិបត្តិការបានបញ្ចប់លោក ឃួង ស្រេង អភិបាលរាជធានីភ្នំពេញ បានចុះទៅពិនិត្យដល់កន្លែងកើតហេតុ និងបានឧបត្ថម្ភថវិកា ២០លានរៀល លើកទឹកចិត្ត ដល់កម្លាំងកងរាជអាវុធហត្ថរាជធានីភ្នំពេញ ដែលបានបំពេញបេសកម្មដោយជោគជ័យ ជួយសង្គ្រោះម្ចាស់ផ្ទះមានសុវត្ថិភាពគ្រប់គ្នា ៕
