បុរសម្នាក់មានកម្លាំងយក្សម្នាក់ មានកម្លាំងខ្លាំងក្លា ដូចរឿងនិទានខ្មែរយើង «កំហែងឈើទាល» ដែល
មនុស្សរាប់លាននាក់ មិនអាចធ្វើបាន ដោយសារគាត់ប្រើដៃទាំង២ សាកល្បងជាមួយកម្លាំងម៉ូតូចំនួន៤គ្រឿង បើទោះជាម៉ូតូទាំងនោះខំប្រឹងរោទ៍សំឡេងយ៉ាងណា ក៏បានត្រឹមតែវិលកង់ហុយដីទ្រលោមតែប៉ុណ្ណោះ។
បើតាមគណនីហ្វេសប៊ុក MD Anik Dewan បានបង្ហោះរូបភាពវីដេអូ បានឲ្យដឹងថា មានបុរសម្នាក់ រស់នៅតំបន់អាស៊ីខាងត្បូង មានមាឌធំល្មម តែគាត់មានកម្លាំងដ៏ខ្លាំងអស្ចារ្យ រហូតអាចចាត់ទុកជាកម្លាំងយក្ស ដែលមនុស្សរាប់លាននាក់ មិនអាចធ្វើបាន។ បុរសម្នាក់នោះ បានឲ្យមនុស្សប្រុសចំនួន៤នាក់ជិះម៉ូតូ៤គ្រឿង សាកល្បងជាមួយនឹងកម្លាំងរបស់គាត់។ នៅពេលនោះ គាត់បានឲ្យអ្នកជិះម៉ូតូម្ខាង២នាក់ ហើយចងខ្សែនឹងម៉ូតូ ទុកកន្ទុយខ្សែមកក្រោយ សម្រាប់គាត់ចាប់ទាញម៉ូតូ និងឲ្យអ្នកបើកដំឡើងហ្គារម៉ូតូ រហូតអស់។
បើតាមរូបភាពនៅក្នុងឃ្លីបវីដេអូនោះ បានបង្ហាញថា បើទោះជាអ្នកបើកម៉ូតូម្ខាង២ ខំប្រឹងរោទ៍ម៉ាស៊ីនយ៉ាងណា ក៏មិនអាចទាញបុរសម្នាក់នោះ ឲ្យកម្រើកឃ្លាតចាកចេញពីទីតាំងរបស់គាត់ឈរបានឡើយ។ លើសពីនេះទៅទៀត គាត់ថែមទាំងឈរតែជើងម្ខាង សម្រាប់ទប់ទល់នឹងកម្លាំងម៉ូតូទាំង៤គ្រឿង។ រីឯម៉ូតូទាំង៤គ្រឿងនោះ បានត្រឹមតែវិលកង់ ទួងដីហុយទ្រលោមងងឹតមេឃតែប៉ុណ្ណោះ។ ឃើញបែបនេះ អ្នកឈរទស្សនា បានទះដៃអបអរសាទរដល់បុរសម្នាក់នោះថែមទៀតផង៕
