ភ្នំពេញ៖ កាលពីថ្ងៃទី១៤ ខែធ្នូ ឆ្នាំ២០២១ នៅចំណុចមុខប៉ុស្តិ៍នគរបាលរដ្ឋបាលស្រះចក តាមបណ្តោយផ្លូវព្រះមុនីវង្ស ស្ថិតក្នុងសង្កាត់ស្រះចក ខណ្ឌដូនពេញ រាជធានីភ្នំពេញ។ក្នុងហេតុការណ៍នេះអ្នកបើករថយន្តបង្កហេតុបានព្យាយាមបើករត់រហូតដល់ចំណុចមុខអតីតទូរទស្សន៍ប៉ុស្តិ៍លេខ៣ ទើបភាគីរថយន្តរងគ្រោះដេញស្ទាក់ជាប់។
មុនកើតហេតុគេឃើញមានមនុស្សប្រុសស្រី៣ទៅ៤ នាក់ជិះរថយន្ត តូយ៉ូតា ព្រូស មួយគ្រឿង ពាក់ស្លាកលេខ ភ្នំពេញ ២AH-៧០៤៨ ធ្វើដំណើរតាមបណ្តោយផ្លូវព្រះមុនីវង្សក្នុងទិសដៅពីជើងទៅត្បូង។ លុះបើកមកដល់ចំណុចកើតហេតុខាងលើ រថយន្តព្រូសនោះបានឈប់រង់ចាំភ្លើងស្តុប ខណៈនោះក៏មានរថយន្តស៊េរីទំនើបមួយគ្រឿងម៉ាក រែង រ៉ូវើរ ពណ៌ស ពាក់ស្លាកលេខ ភ្នំពេញ ២BK-៨៨០៩ បើកបរដោយបុរសម្នាក់ដែលមហាជនស្គាល់ថា ជា VJ តាប៊ុយ ពិធីករដ៏ល្បីឈ្មោះមួយរូប មកពីក្រោយបុករថយន្តព្រូសពេញទំហឹង បណ្ដាលឱ្យរងការខូចខាតយ៉ាងដំណំ ហើយមិនបានឈប់ធ្វើការដោះស្រាយនោះទេ គឺព្យាយាមបើករត់ចេញពីកន្លែងកើតហេតុ រហូតដល់ចំណុចមុខអតីតទូរទស្សន៍ប៉ុស្តិ៍លេខ៣ ផ្លូវសហព័ន្ធរុស្ស៊ី ត្រូវបានជនរងគ្រោះបើករថយន្តដេញតាមឃាត់ជាប់។ក្រោយកើតហេតុគេឃើញ VJ តាប៊ុយដើរមិនត្រង់ផ្លូវទេ សង្ស័យស្រវឹងស្រាខ្លាំង ត្រូវបានបុរស៣នាក់ទៀត គ្រាទៅដាក់ក្នុងរថយន្តមួយគ្រឿងទៀត ដោយប្រាប់ថា បញ្ជូនទៅប៉ុស្តិ៍នគរបាល។ ចំណែករថយន្តទាំងពីរគ្រឿងត្រូវបានសមត្ថកិច្ចយកទៅរក្សាទុករង់ចាំធ្វើការដោះស្រាយគ្នាបន្ត៕
