ខេត្តសៀមរាប ៖ ស្រ្តីម្នាក់ ត្រូវបានឃាតករកំណាចសម្លាប់នាងចោលគ្មានប្រណី បណ្តាលឲ្យស្លាប់យ៉ាងអាណោចអាធ័ម ត្រូវបានគេប្រទះឃើញសពនាង បង្កការភ្ញាក់ផ្អើល កាលពីរសៀលថ្ងៃទី០២ ខែធ្នូ ឆ្នាំ២០២១ នៅក្រុមទី១ ស្ថិតភូមិទក្សិណត្បូង សង្កាត់គោកចក ក្រុងសៀមរាប ។ស្រ្តីរងគ្រោះ មានឈ្មោះសូ ចាន់ធី អាយុ៤១ឆ្នាំ ស្នាក់នៅផ្ទះជួល ក្នុងមូលដ្ឋានខាងលើ។ ក្រោយកើតហេតុ សមត្ថកិច្ចចម្រុះបានចុះទៅដល់ទីតាំងកើតហេតុ ដើម្បីពិនិត្យលើសាកសពនារីរងគ្រោះ ។ ចំណែក បុរសជាប្តី បានរត់គេចខ្លួនបាត់ស្រមោល។
ជុំវិញនឹងករណីនេះ សមត្ថកិច្ចដាក់សង្ស័យលើបុរសជាប្តី ដែលកំពុងរត់គេចខ្លួន។ តែយ៉ាងណា នេះគ្រាន់តែជាការសន្និដ្ឋានដំបូងប៉ុណ្ណោះ រង់ចាំសមត្ថកិច្ចឃាត់ខ្លួនបុរសជាប្តីបាន ទើបដឹងថា អ្នកណាជាឃាតករពិតប្រាកដ។សពនារីរងគ្រោះ ក្រោយពីសមត្ថកិច្ចជំនាញធ្វើកោសល្យរួចរាល់ បានធ្វើកំណត់ហេតុ ប្រគល់ជូនក្រុមគ្រួសារយកទៅចាត់ចែងរៀបចំធ្វើបុណ្យតាមប្រពៃណី ទាំងក្តីសោកអាល័យជាពន់ពេក៕
