ភ្នំពេញ ៖ ករណីក្មេងអាយុ១ខួប៨ខែ ដេីរធ្លាក់ប្រឡាយ លិចបាត់ឈឹង បង្កការភ្ញាក់ផ្អើលដល់ប្រជាពលរដ្ឋរស់នៅជិតខាង កាលពីវេលាម៉ោង០៤ល្ងាច ថ្ងៃទី៤ ខែវិច្ឆិកា ឆ្នាំ២០២១នេះ ននៅចំណុចមាត់ប្រឡាយទឹកស្អុយបឹងទំពន់ ភូមិត្នោតជ្រុំ៣ សង្កាត់បឹងទំពន់២ ខណ្ឌមានជ័យ រាជធានីភ្នំពេញ ។ ពលរដ្ឋបានរាយការណ៍ប្រាប់សមត្ថកិច្ចមូលដ្ឋាន ននិងបានចុះជួយរាវរក តែមកទល់ម៉ោង៦ល្ងាចថ្ងៃដដែលនេះ នៅរកមិនទាន់ឃេីញ។
សពក្មេងប្រុសរងគ្រោះឈ្មោះ ឃាង សុខលាភ អាយុ១ខួប៨ខែ មាន ម្តាយឈ្មោះ ទូច និងឪពុកឈ្មោះ សំបូរ មុខរបរដឹកគ្រឿងសង្ហារឹម ស្នាក់នៅបន្ទប់ជួល ក្បែរកន្លែងកើតហេតុខាងលើ ។
បើតាមសម្ដីគ្រួសាររបស់ក្មេងរងគ្រោះបានរៀបរាប់ប្រាប់ទាំងអួលដេីមកថា មុនពេលកើតហេតុ កូនរបស់ពួកគាត់បានសុំលុយទៅទិញការ៉េមហូប ដែលមានអ្នកលក់នៅជិតផ្ទះជួលរបស់ខ្លួនដែរ លុះពេលឲ្យលុយ៥០០៛ទៅទិញការ៉េមហូបរួចហើយ ពួកគាត់ជាឪពុកម្តាយមិនបានចាប់អារម្មណ៍ថា កូនដើរសំដៅទៅម្ដុំមាត់ប្រឡាយនោះទេ ព្រោះពេលកន្លងមក កូនរបស់ពួកគាត់ តែងតែដើរលេងនៅម្តុំនោះ ជាមួយក្មេងៗដទៃទៀត ដោយមិនមានបញ្ហាអ្វីនោះទេ លុះមកដល់ពេលកើតហេតុ ក៏ស្រាប់តែមានក្មេងៗនិងបងប្អូនប្រជាពលរដ្ឋរត់មកប្រាប់គាត់ថា មានកូនក្មេងបានលង់ទឹកប្រឡាយបាត់ហើយ។
បើតាមប្រភពពីបងប្អូនប្រជាពលរដ្ឋម្ខាងប្រឡាយវិញ បានប្រាប់ The Mirror News ថា មុនពេលកើតហេតុ គេបានឃើញក្មេងប្រុសរង គ្រោះរត់ទៅតាមបាល់ដែលធ្លាក់ចូលប្រឡាយ ក៏រអិលជើងធ្លាក់ចូលទឹកប្រឡាយតែម្តង ពេលនោះពួកគាត់មិនហ៊ានជួយទេ ព្រោះមិនចេះហែលទឹក បានត្រឹមស្រែកឆោឡោពីម្ខាងប្រឡាយ ផ្អេីលដល់អ្នកនៅម្ខាងប្រឡាយឯណេះវិញរត់ទៅរកបងប្អូនប្រជាពលរដ្ឋដែលចេះហែលទឹក ឲ្យចុះជួយរាវរុករកតែប៉ុណ្ណោះ និងផ្អេីលដល់ក្រុមការងារ ជួសជុលស្ថានីយ៍បូមទឹកបឹងទំពន់ យក អេស្កាវាទ័រ មកជួយកាយយកសំរាមនិងកំប្លោកដាក់ឡាន ដេីម្បីងាយស្រួលរក ហេីយសំរាមនិងកំប្លោកដែលកាយយកចេញនោះ សរុបទៅជាង២០ឡានឯណោះ ។
ក្នុងករណីនេះដែរ បន្ទាប់ពីមានបងប្អូនប្រជាពលរដ្ឋចុះរុករកជាង៣ម៉ោង អស់ចិត្តហេីយនៅតែមិនឃើញ និងឃេីញម្ដាយក្មេងរងគ្រោះ ស្វែងរកអ្នកចេះហែលទឹក ចុះទៅរាវរកបន្តទៀត តែមិនមានអ្នកណាចុះទៅទៀត ទើបបងម៉េង អអ្នកយកព័ត៍មាននៅខណ្ឌមានជ័យ បានទំនាក់ទំនងតាមទូរស័ព្ទ សុំជំនួយផ្ទាល់ ពីខាងក្រុមសង្គ្រោះ ទ័ពពិសេស ៩១១ ដេីម្បីចុះមកជួយអន្តរាគមន៍មុជទឹករកផង។ បន្ទាប់ពីទទួលដំណឹងបែបនេះភ្លាម លោកឧត្តមសេនីយ៍ត្រី ស៊ុ សំណាង មេបញ្ជាការរង និងជានាយសេនាធិការបញ្ជាការដ្ឋានទ័ពពិសេស នៃកងទ័ពជើងគោក ហៅកាត់៩១១ បានដឹកនាំ កម្លាំងទ័ពពិសេសសរុបចំនួន ១៤នាក់ ចេញមកជួយអន្តរាគមន៍ឆ្ពោះមកកន្លែងកេីតហេតុ សហការជាមួយសមត្ថកិច្ចមូលដ្ឋាន ដេីម្បីពិនិត្យមេីលស្ថានភាពនិងដំណេីររឿងហេតុ ដេីម្បីចុះប្រតិបត្តិការរុករក ដោយប្រើរយៈពេលជិត២០នាទី ទើបរកឃើញសពក្មេងរងគ្រោះនៅវេលាម៉ោង៨យប់ថ្ងៃដដែល។
ក្រោយពេលកើតហេតុ បន្ទាប់ពីក្រុមសង្គ្រោះជំនាញមុជទឹកទ័ពពិសេស៩១១ រុករកឃើញសពក្មេងរងគ្រោះរួច ហើយកម្លាំងជំនាញក៏ប្រគល់សពឲ្យសមត្ថកិច្ចមូលដ្ឋាន ធ្វេីសំណាកនិងពិនិត្យមេីលតាមជំនាញ រួចធ្វេីកំណត់ហេតុ ប្រគល់ឲ្យក្រុមគ្រួសារសាច់ញាតិចាត់ចែងធ្វើបុណ្យតាមប្រពៃណី នៅផ្ទះក្មេងប្រុសរងគ្រោះផ្ទាល់តែម្តង៕
