ខេត្តក្រចេះ ៖ សាហាវមែន ព្រោះតែភ្លើងគំនុំ បុរសម្នាក់ ត្រូវបានជនដៃដល់ជាឃាតក យកលំពែង ចាក់ធ្លុះឆ្អឹងជំនី ខណៈកំពុងដេកលង់លក់ បណ្តាលឲ្យស្លាប់យ៉ាងរន្ធត់ ភ្លាមៗ កាលពីថ្ងៃទី១៣ ខែតុលា ឆ្នាំ២០២១ នៅចំណុចភូមិព្រៃគោ ឃុំដំរីផុង ស្រុកឆ្លូង ខេត្តក្រចេះ ។ នេះបើយោងតាមផេក ស្នងការដ្ឋាននគរបាលខេត្តក្រចេះ។
សមត្ថកិច្ចបានឲ្យដឹងថា ជនរងគ្រោះដែលត្រូវបាន ជនដៃដល់ជាឃាតក ចាក់សម្លាប់នេះ មានឈ្មោះ គឹម ញឹម ភេទប្រុស អាយុ៥៣ឆ្នាំ , ចំណែកជនដៃដល់ដែលសមត្ថកិច្ចចាប់ឃាត់ខ្លួនបាន មានឈ្មោះ ខាំ យ៉ាត ភេទប្រុស អាយុ៥២ឆ្នាំ អ្នកទាំង២ រស់នៅក្នុងភូមិឃុំខាងលើជាមួយគ្នា ។
សមត្ថកិច្ចបានបន្តឲ្យដឹងទៀតថាមុនពេលកើតហេតុជនរងគ្រោះកំពុងតែដេកលង់លក់ដោយមិនដឹងខ្លួន ខណៈនោះស្រាប់តែជនដៃដល់ដែលមានគំនុំជាមួយគ្នានោះបានយកលំពែងមកលបចាក់សម្លាប់ជនរងគ្រោះ ធ្លុះឆ្អឹងជំនី បណ្តាលឲ្យស្លាប់ភ្លាមៗតែម្តង ចំណែកជនដៃដល់ត្រូវបានសមត្ថកិច្ចឃាត់ខ្លួននិង កសាងសំណុំរឿងបញ្ជូនខ្លួនទៅកាន់តុលាការ ដើម្បីចាត់ការតាមច្បាប់បន្តទៀត ៕
