ភ្នំពេញ៖ មានករណីគ្រោះអគ្គីភ័យមួយបានកើតឡើងស្ថិតនៅតាមបណ្តោយផ្លូវ២០០ ក្នុងសង្កាត់បឹងរាំង ខណ្ឌដូនពេញ ដែលបានឆក់យកទ្រព្យសម្បត្តិ របួសមនុស្សម្នាក់ និងឆក់យកជីវិតមនុស្សចំនួន៤នាក់កាលពីម៉ោងជាង៤ទៀបភ្លឺ ថ្ងៃទី២៩ ខែមិថុនា ឆ្នាំ២០២១ ។
បើតាមសមត្ថកិច្ចបានឲ្យដឹងថា បន្ទាប់ពីទទួលបានព័ត៌មានភ្លាមកម្លាំងខាងរថយន្តការិយាល័យ អគ្គិភ័យចំនួន៣៨ គ្រឿង ប្រើប្រាស់ទឹកអស់ចំនួន ៣៨ ឡាន ស្មើនឹង ១៥២ ម៉ែត្រគូប និង រថយន្តក្រុមហ៊ុនស្រាបៀរកម្ពុជាចំនួន ០១ គ្រឿង ប្រើប្រាស់ទឹកអស់ចំនួន ០២ ឡានសើ្មនឹង ១២ ម៉ែត្រគូប ។ រហូតដល់វេលាម៉ោង ០៦:០០ នាទីព្រឹក នាថ្ងៃខែឆ្នាំដដែលទើបត្រូវបានពន្លត់អគ្គីភ័យនេះ បានជាស្ថាពរ ។
ប្រភពដដែលនេះបានឲ្យដឹងបន្តថា ផ្ទះដែលត្រូវអគ្គីភ័យឆាបឆេះខាងលើនេះប្រភេទសំណង់ ថ្មបេតុង ទំហំ០៩ម៉ែត្រ x ៣០ម៉ែត្រ ដែលមានកម្ពស់ចំនួន០៣ជាន់ ជាផ្ទះរបស់ជនរងគ្រោះឈ្មោះ ហុង ពេជ្រហោះភេទប្រុស អាយុ ៧១ឆាំ្ន ។ ចំណែកអ្នករងរបួសស្រាលម្នាក់ឈ្មោះ ម៉ូច សីហា ភេទប្រុស អាយុ ២៤ ឆ្នាំ មុខរបរមន្រ្តីកិច្ចសន្យាអគ្គិភ័យ ។ ដោយឡែកអ្នកស្លាប់ទាំង៤នាក់មិនទាន់ស្គាល់អត្ត សញ្ញាណនៅឡើយ ។
បើទោះបីយ៉ាងណាក្តីសមត្ថកិច្ចបានបញ្ជាក់ថា ផ្ទះខាងលើនេះត្រូវបានឆេះផ្ទះជាន់ផ្ទាល់ដី អស់ទាំងស្រុង រួមទាំងឆេះសម្ភារផ្សេងៗទៀតរួម ឆេះរថយន្តFord Willdrak ពណ៌ខ្មៅ ពាក់ស្លាកលេខ ភ្នំពេញ ២BB-៨២៣៣ចំនួន០១គ្រឿង ឆេះរថយន្តLuxus ៣៣០ ពណ៌ស ពាក់ស្លាក់លេខ ភ្នំពេញ ២AL-១១៥៨ ចំនួន ០១ គ្រឿង និងឆេះម៉ូតូសរុបចំនួន ០៧ គ្រឿង នឹងពុំបានឆេះរាលដាលដល់ផ្ទះ អ្នកជិតខាងឡើយ ។ ដោយឡែកចំពោះមូលហេតុដែលនាំឲ្យកើតអគ្គីភ័យនេះនៅមិនទាន់ដឹងមូល ហេតុច្បាស់នៅឡើយ ៕
