ភ្នំពេញ:មានករណីគ្រោះថ្នាក់ចរាចរណ៍ដ៏រន្ធត់មួយបានកើតឡើងដោយសារបុរសម្នាក់បើករថយន្ដក្រឡុកស៊ីម៉ងត៍មួយគ្រឿងមិនប្រយ័ត្នជ្រុលទៅបុកនិងកិនម៉ូតូមួយគ្រឿងបណ្ដាលឲ្យនារីម្នាក់ស្លាប់ភ្លាមៗនៅនឹងកន្លែងកើតហេតុកាលពីវេលាម៉ោង ៥ និង ២៥ នាទីថ្ងៃទី២២ ខែមិថុនា ឆ្នាំ ២០២១ នៅតាមបណ្តោយផ្លូវ៥០ម៉ែតក្នុងសង្កាត់ចោមចៅ១ ខណ្ឌពោធិ៍សែនជ័យ រាជធានីភ្នំពេញ ។
បើតាមប្រជាពលរដ្ឋនៅកន្លែងកើតហេតុ បានឲ្យដឹងថា មុនកើតហេតុគេឃើញបុរសម្នាក់បើករថយន្តក្រឡុកស៊ីម៉ងត៍មួយគ្រឿងក្បាលពណ៌សពាក់ស្លាកលេខភ្នំពេញ 5A-0687ធ្វើដំណើរតាមបណ្តោយផ្លូវ៥០ម៉ែតដៅពីជើងទៅត្បូងលុះមកដល់ចំណុចកើតហេតុខាងលើក៏ជ្រុលទៅបុកនិងកិនម៉ូតូមួយគ្រឿងម៉ាកឌ្រីមសង់ពណ៌ខ្មៅពាក់ស្លាកលេខភ្នំពេញ1BY-8009-ជិះដោយបុរសម្នាក់រួមដំណើរដោយនារីម្នាក់ទៀតធ្វើដំណើរស្របទិសគ្នាពីជើងទៅត្បូងដូចគ្នាហើយកិនពីលើបណ្ដាលឱ្យអ្នកជិះពីក្រោយម៉ូតូនិងអ្នករួមដំណើរដួលខ្ទាតចេញរងរបួសស្រាលនិងស្ត្រីម្នាក់ទៀតស្លាប់ភ្លាមៗនៅនឹងកន្លែង។
ភ្លាមៗនោះបន្ទាប់ពីកើតហេតុកម្លាំងសមត្ថកិច្ចមូលដ្ឋានក៏បានចុះមកដល់ទីតាំងកើតនោះហេតុនោះភ្លាមរួចទាក់ទងទៅផ្នែកជំនាញចរាចរណ៍ផ្លូវគោករាជធានីភ្នំពេញឱ្យចុះមកធ្វើការវាស់វែងនិងយកម៉ូតូជនរងគ្រោះនិងរថយន្តបង្ករទៅរក្សាទុកដើម្បីរង់ចាំដោះស្រាយគ្នាពេលក្រោយ ចំណែកសាកសពសមត្ថកិច្ចជំនាញកុសលវិច្ឆ័យបានធ្វើកំណត់ហេតុរួចរាល់ក៏បានប្រគល់ទៅឱ្យក្រុមគ្រួសារយកទៅធ្វើបុណ្យតាមប្រពៃណី ៕
