ភ្នំពេញ៖ មានករណីគ្រោះថ្នាក់ចរាចរណ៍ដ៏ភ្ញាក់ផ្អើលមួយបានកើតឡើងដែលបង្កដោយនារីស្រស់ស្អាតម្នាក់ដែលសង្ស័យស្រវឹងស្រាបើករថយន្តស៊េរីទំនើបមួយគ្រឿង បោះពួយយ៉ាងលឿន បានជ្រុលទៅបុកបង្គោលភ្លើងពេញទំហឹង បណ្ដាលឲ្យដាច់ចេញពីគ្នា រថយន្តបង្កខូចខាតយ៉ាងដំណំ សំណាងល្អមិនមានអ្នករបួស កាលវេលាម៉ោង១និង០០នាទីយប់ រំលងអធ្រាត្រឈានចូលថ្ងៃអង្គារ ទី៧ ខែមិថុនា ឆ្នាំ២០២១ ស្ថិតតាមបណ្ដោយផ្លូវ៦១៤ សង្កាត់ បឹងកក់ទី២ ខណ្ឌទួលគោក ។
បើតាមប្រជាបលរដ្ឋដែលឃើញហេតុការណ៍នេះបានឲ្យដឹងថា មុនពេលកើតហេតុ គេឃើញនារីរូបស្រស់ម្នាក់ សង្ស័យស្រវឹងស្រា បើករថយន្តស៊េរីទំនើបម៉ាក BMW ពណ៌ស ពាក់ផ្លាកលេខភ្នំពេញ 2BG 1123 ធ្វើដំណើរទិសដៅពីលិចទៅកើត បោះពួយយ៉ាងលឿន បានជ្រុលទៅបុកបង្គោលពេញទំហឹង បណ្ដាលដាច់ជាពីររថយន្តផ្ទុះពោង ខូចខាតផ្នែកខាងមុខ ស្ទើរទាំងស្រុង ។ ម្ចាស់រថយន្តបានបើកទ្វារចេញគេចខ្លូន ពីកន្លែងកើតហេតុបាត់ ។
បន្ទាប់ពីកើតហេតុសមត្ថកិច្ចមូលដ្ឋានចុះមកទាក់ទងទៅសមត្ថកិច្ចជំនាញ ឲ្យមកវាស់វែងស្ទូចរថយន្តបង្ក ទៅការិយាល័យចរាចរណ៍ផ្លូវគោកស្នងការាជធានីភ្នំពេញ រង់ចាំឲ្យម្ចាស់រថយន្តចូលខ្លូន មកដោះស្រាយតាមផ្លូវច្បាប់ ៕
