ទីលានបាញ់កាំភ្លើងស្តង់ដាអន្តរជាតិ នៅខេត្តព្រះសីហនុ ត្រូវបានសាង់សង់ សម្រាប់ស៊ីហ្គេម ឆ្នាំ២០២៣

កីឡាជាតិ៖ សហព័ន្ធកីឡាបាញ់កាំភ្លើងកម្ពុជាបានសម្រេចជ្រើសរើសយកទីតាំងឧទ្យានជាតិរាម ក្នុងទឹកដីខេត្តព្រះសីហនុ ក្នុងការសាងសង់ទីលានកីឡាបាញ់កាំភ្លើងស្តង់ដាអន្តរជាតិ សម្រាប់ម្រើដល់ការទទួលធ្វើម្ចាស់ផ្ទះ ការប្រកួតកីឡាស៊ីហ្គេម លើកទី៣២ ឆ្នាំ២០២៣។
ការសម្រេចសាងសង់ទីលាននេះ ត្រូវបានធ្វើឡើងរវាងសហព័ន្ធកីឡាបាញ់កាំភ្លើងកម្ពុជា និងក្រុមហ៊ុន Yeejia Tourism Development Company LTD តាមរយៈការចុះកិច្ចព្រមព្រៀង ស្តីពីកិច្ចសហការសាងសង់ និងផ្គត់ផ្គង់ ក្នុងតំបន់ទេសចរណ៍រាម បូទិក ដែលមានគម្រោងសាងសង់រយៈពេល១ឆ្នាំលើផ្ទៃដីសរុប២៥ហិចតា។
ឯកឧត្តម នាយឧត្តមសេនីយ៍ មៀច សុផាន់ណា ប្រធានសហព័ន្ធកីឡាបាញ់កាំភ្លើងកម្ពុជាមានប្រសាសន៍ថា ទីលានបាញ់កាំភ្លើងស្តង់ដាអន្តរជាតិនេះ គឺសហព័ន្ធបានកំណត់ការសាងសង់ក្នុងរយៈពេល១ឆ្នាំប៉ុណ្ណោះ ដើម្បីឲ្យក្រុមជម្រើសជាតិបាញ់កាំភ្លើងកម្ពុជាស្នាក់នៅ-ហ្វឹកហាត់អភិវឌ្ឍសមត្ថភាព ត្រៀមឆ្ពោះទៅរកការប្រកួតកម្រិតអន្តរជាតិនានា ពិសេស ស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។ ឯកឧត្តមប្រធានសហព័ន្ធគូសបញ្ជាក់ថា ទីលានកម្រិតស្តង់ដាមួយនេះមិនត្រឹមជាកន្លែងសម្រាប់ហ្វឹកហាត់ និងប្រកួតកីឡាស៊ីហ្គេម ឆ្នាំ២០២៣ ប៉ុណ្ណោះទេ ប៉ុន្តែវានឹងក្លាយជាកន្លែងស្រូបទាញភ្ញៀវទេសចរណ៍ជាតិ និងអន្តរជាតិមកកំសាន្តផងដែរ។ ដូច្នេះហើយ ទីលានបាញ់កាំភ្លើងនេះ នឹងក្លាយជាចលករទាក់ទាញកំណើនភ្ញៀវទេសចរណ៍មកកំសាន្តនៅខេត្តព្រះសីហនុកាន់តែច្រើនបន្ថែមទៀត។ មូលហេតុដែលសហព័ន្ធសម្រេចជ្រើសរើសយកឧទ្យានជាតិរាម ខេត្តព្រះសីហនុ ធ្វើជាទីលានដោយសហព័ន្ធមើលឃើញថា នៅរាជធានីភ្នំពេញមានកីឡាច្រើនប្រភេទប្រកួតហើយ ដូច្នេះ ខេត្តព្រះសីហនុ គឺជាគោលដៅទេសរចណ៍តំបន់ឆ្នេរដ៏មានសក្តានុពលមួយ សម្រាប់ទាក់ទាញសម្រាប់ភ្ញៀវទេសចរណ៍អន្តរជាតិ ជាពិសេសគឺកីឡាករ កីឡាការិនីអន្តរជាតិ។
លោក ហ្វូ ស៊ានធីង អគ្គនាយកក្រុមហ៊ុន Yeejia មានប្រសាសន៍ថា ដោយក្រុមហ៊ុនមើលឃើញថា កីឡាបាញ់កាំភ្លើងជាប្រភេទសក្តានុពលទាក់ទាញភ្ញៀវទេសចរណ៍ជាតិ និងអន្តរជាតិ ជាពិសេសគឺជួយជំរុញដល់គុណភាពបច្ចេកទេសសម្រាប់ក្រុមជម្រើសជាតិ ត្រៀមស៊ីហ្កេម ឆ្នាំ២០២៣ផងដែរ។ ការផ្តល់ជូនទីតាំងនេះ វាប្រភពទាក់ទាញភ្ញៀវទេសចរណ៍មកកំសាន្ត នៅខេត្តព្រះសីហនុ និងនៅរមណីយដ្ឋានរបស់លោកកាន់តែច្រើនផងដែរ។ លោកអគ្គនាយកអះអាងថា ក្រុមហ៊ុននឹងជួយសាងសង់ទីលានជូនសហព័ន្ធ ដើម្បីបម្រើដល់ការហ្វឹកហាត់របស់កីឡាករ កីឡាការិនី និងការទទួលធ្វើជាម្ចាស់ផ្ទះ ការប្រកួតកីឡាស៊ីហ្គេម ឆ្នាំ២០២៣ ដើម្បីជួយជំរុញនូវផែនការយុទ្ធសាស្ត្ររបស់សហព័ន្ធឲ្យទទទួលបានជោគជ័យផងដែរ។
គួរបញ្ជាក់ថា ទីលានកីឡាបាញ់កាំភ្លើងនេះនឹងប្រើប្រាស់ថវិកាប្រមាណ ២ទៅ៣លានដុល្លារអាមេរិក។ ខេត្តព្រះសីហនុ គឺគោលដៅមួយ ក្នុងចំណោមគោលដៅសំខាន់ៗចំនួន៥ ក្នុងដំណើរឆ្ពោះទៅទទួលធ្វើម្ចាស់ផ្ទះ ស៊ីហ្គេម ឆ្នាំ២០២៣ ដោយក្រៅពីកីឡាបាញ់កាំភ្លើង គឺកីឡាទូកក្តោង និងម៉ូតូទឹកក៏ធ្វើនៅខេត្តព្រះសីហនុនេះដែរ ស្របពេលដែលខេត្តកំពត ទទួលរៀបចំកីឡាប្រណាំងទូកនាគ ទូកកានូ កាយ៉ាក និងរ៉ូអ៊ីង រីឯខេត្តកែបទទួលធ្វើម្ចាស់ផ្ទះ ប្រភេទកីឡាទ្រីយ៉ាត្លុង៕