ភ្នំពេញ ៖ សូមមើលជាគំរូ អ្នកដែលមានលុយអោយគេខ្ចី សូមប្រយ័ត្នផង ! បុរសម្នាក់ បានទៅទារលុយ ពីអ្នកជំពាក់ត្រឹមតែ១ម៉ឺរៀល ក៏កើតជាទំនាស់ពាក្យសំដី ហើយត្រូវអ្នកជំពាក់លុយនោះ ទាញកាំបិត ដេញកាប់ត្រូវចំនួន៣កាំបិត ចំខ្នង បណ្ដាលឲ្យរងរបួសធ្ងន់។ ហេតុការណ៍នបង្កឲ្យមានការភ្ញាក់ផ្អើល កាលពីម៉ោង ១ និង២០នាទីរំលងអធ្រាត្រឈានចូលថ្ងៃទី១ ខែមេសា ឆ្នាំ២០២១ ស្ថិតក្នុងភូមិដើមចាន់ សង្កាត់ច្បារអំពៅ២ ខណ្ឌច្បារអំពៅ រាជធានីភ្នំពេញ។
ជនរងគ្រោះមានឈ្មោះ សុខ កា ភេទប្រុស អាយុ២៨ ឆ្នាំ មុខរបបរត់តុការ ស្នាក់នៅសង្កាត់ច្បារអំពៅ១ ខណ្ឌច្បារអំពៅ ។ រីឯជនបង្កមានឈ្មោះ ពៅ អាយុជាង២០ឆ្នាំ មុខរបបមិនពិតប្រាកដ ។
តាមប្រភពព័ត៌មានពីកន្លែងកើតហេតុបានឲ្យដឹងថាមុនពេលកើតហេតុ ជនរងគ្រោះបានទៅទាលុយពីជនដៃដល់ចំនួន១មុឺនរៀល តែជនបង្កគ្មានលុយឲ្យទេថែមទាំងទាស់សម្ដីគ្នារហូតទាញកាំបិតកាប់មកលេីជនរងគ្រោះពីក្រោយខ្នង៣កាំបិត បណ្ដាលឲ្យហូរឈាមពេញខ្លួនរងរបួសធ្ងន់ បន្ទាប់មកជនដៃដល់គេចខ្លួនបាត់ ស្រមោល៕
