ភ្នំពេញ ៖ ជនសង្ស័យម្នាក់ ត្រូវបានសមត្ថកិច្ចឃាត់ខ្លួន និងបក្ខពួក២នាក់ទៀត បានរត់គេចខ្លួន បាត់ ក្រោយពីបានស្គាល់គ្នា ពួកគេបានបបួលគ្នា ទៅកាច់ ក ម៉ូតូ បានពីចំណុចផ្លូវ២៧១ ម្តុំពេទ្យរុស្សី និងបន្តជិះគេចខ្លួនពេញទីក្រុងភ្នំពេញ ហើយត្រូវអស់ល័ក្ខ ត្រង់ចំណុចវិថីព្រះមុន្នីវង្ស ក្បែរផ្លូវបំបែក៣១០។
ហេតុការណ៍នេះបានកើតឡើងនៅម៉ោង២កន្លះរំលងអធ្រាត្រ ឈានចូលថ្ងៃទី១ ខែមេសា ឆ្នាំ២០២១ ដោយទីតាំងឃាត់ខ្លួនជនសង្ស័យ ស្ថិតនៅក្បែរផ្លូវបំបែក៣១០ កែវវិថីព្រះមុន្នីវង្ស ដោយម៉ូតូដែលជនសង្ស័យបានលួច គឺម៉ាក ឌ្រីមសេ១២៥ ពណ៌ខ្មៅ ពាក់ស្លាកលេខ ព្រៃវែង 1M-4714។
ក្រោយពេលឃាត់ខ្លួន ជនសង្ស័យបានអោយដឹងថា ខ្លួនដាច់លុយពេក ទើបធ្វើសកម្មភាពលួចម៉ូតូគេ ប៉ុន្តែខ្លួនមិនបានលួចទេ គឺមិត្តភ័ក្តចំនួន២នាក់ ដែលទើបរាប់អានបានប៉ុន្មាននាទីជាអ្នកបបួល។ ខណៈលួចបានទើបអោយជនសង្ស័យជិះរត់គេច ទើបត្រូវសមត្ថកិច្ចតាមស្ទាក់ចាប់បាន នៅទីតាំងខាងលើតែម្តង។
បន្ទាប់ពីកើតហេតុ សមត្ថកិច្ចបាននាំខ្លួនជនសង្ស័យ ទៅកាន់ប៉ុស្តិ៍បឹងទំពុន ដើម្បីធ្វើការសាកសួរ និងស្រាវជ្រាវរកជនសង្ស័យ២នាក់ទៀតមកចាត់ការតាមនីតិវិធីច្បាប់ផងដែរ៕
