រដ្ឋមន្រ្តីក្រសួងយុត្តិធម៌ នឹងបើកកិច្ចប្រជុំ ពិនិត្យបញ្ជីឈ្មោះទណ្ឌិត ដើម្បីបន្ធូរបន្ថយទោស និងលើកលែងទោស

ភ្នំពេញ ៖ នៅវេលាម៉ោង២និង៣០ នាទី រសៀល ថ្ងៃទី៣១ ខែមីនា ឆ្នាំ២០២១ ស្អែកនេះ ឯកឧត្តម កើត រិទ្ធ រដ្ឋមន្ត្រីក្រសួងយុត្តិធម៌ និងជាប្រធានគណៈកម្មការថ្នាក់ជាតិពិនិត្យ និងវាយតម្លៃបញ្ជីឈ្មោះទណ្ឌិតស្នើសុំបន្ធូរបន្ថយទោស និងលើកលែងទោស នឹងដឹកនាំកិច្ចប្រជុំគណៈកម្មការថ្នាក់ជាតិ ដោយធ្វើឡើងតាមប្រព័ន្ធអេឡេត្រូនិច(ZOOM) ដើម្បីពិនិត្យបញ្ជីឈ្មោះទណ្ឌិត ដែលបានស្នើសុំបន្ធូរបន្ថយទោស និងលើកលែងទោសក្នុង ឱកា ស ពិធីបុណ្យចូលឆ្នាំប្រពៃណីជាតិខ្មែរឆ្នាំ២០២១ ដែលនឹងប្រព្រឹត្តទៅនាថ្ងៃទី ១៤, ១៥ និង១៦ ខែមេសា ឆ្នាំ២០២១ ខាងមុខនេះ។ នេះបើយោងតាមប្រភពព័ត៌មានពីឯកឧត្តម គឹម សន្តិភាព រដ្ឋលេខាធិការក្រសួងយុត្តិធម៌ បានឲ្យដឹងនាថ្ងៃទី៣០ ខែមីនា ឆ្នាំ២០២១នេះ។

កិច្ចប្រជុំនេះ បានធ្វើឡើង តាមសំណើសុំពីគណៈកម្មការរាជធានីខេត្តចំនួន២៣ (ពន្ធនាគាររាជធានី~ខេត្តចំនួន ២៣) និងគណៈកម្មការក្រសួងមហាផ្ទៃ(មណ្ឌលអប់រំកែប្រែទាំង ៤) ដែលសរុបទណ្ឌិតមានចំនួន ៥៤២នាក់ (ស្រី ៦៨ នាក់) ក្នុងនោះ៖ ១. ស្នើសុំលើកលែងទោសចំនួន ៧០ នាក់ (ស្រី ០៩នាក់) និង២.ស្នើសុំបន្ធូរបន្ថយទោសចំនួន ៤៧២ នាក់ (ស្រី ៥៩ នាក់)៕