សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានឧបត្ថម្ភ អ្នកបើកបរនិងពលករមកពីប្រទេសថៃជួបឧបទ្ទវហេតុ

ភ្នំពេញ ៖ នៅថ្ងៃអាទិត្យ ទី ១៤ ខែមីនា ឆ្នាំ២០២១នេះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានចាត់ឱ្យលោកជំទាវ ម៉ែន នារីសោភ័គ អគ្គលេខាធិការរងទី១ កាកបាទក្រហមកម្ពុជា និងសហការី ចុះសួរសុខទុក្ខ និងនាំយកអំណោយមនុស្សធម៌ផ្តល់ជូនលោកវរសេនីយ៍ត្រី កុយ ចន្ថន ជាអ្នកបើករថយន្ដយោធារបស់កងពលតូចដឹកជញ្ជូនលេខ៩៩ ដែលបានរងរបួសធ្ងន់ធ្ងរក្នុងឧបទ្ទវហេតុគ្រោះថ្នាក់ចរាចរណ៍ក្រឡាប់រថយន្ត ខណៈពេលដឹកពលករមកពីព្រំដែនអូស្មាច់ទៅធ្វើចត្តាឡីស័កនៅខេត្តតាកែវ និងខេត្តកំពត បានជួបឧបទ្ទវហេតុគ្រោះថ្នាក់ចរាចរណ៍ក្រឡាប់រថយន្ត បានបណ្តាលឱ្យមានអ្នករបួស ចំនួនធ្ងន់-ស្រាលចំនួន ១០នាក់ កាលពីថ្ងៃទី១៣ ខែមីនា ឆ្នាំ២០២១ម្សិលម៉ិញនេះ។

សូមរម្លឹកថា អំណោយដែលកាកបាទក្រហមកម្ពុជាផ្តល់ជូនលោកវរសេនីយ៍ត្រី កុយ ចន្ថន ដែលរងរបួសធ្ងន់ធ្ងរ រួមមាន ទឹកដោះគោឆៅ មុង ភួយ សារុង ក្រមា អាវយឺត និងថវិកា ១០លានរៀល ។ ដោយឡែក ពលករ និងអ្នកជំងឺ ក្នុងម្នាក់ៗទទួលបាន ទឹកដោះគោឆៅ មុង ភួយ សារុង ក្រមា អាវយឺត និងថវិកា ២លានរៀល ៕