ខេត្តស្វាយរៀង៖ រថយន្ដឡិចស៊ីមួយគ្រឿងដឹកជនជាតិចិន បានបើកបោះពួយយ៉ាងលឿន ក្រឡាប់ចង្រ្គាង បណ្ដាលឲ្យមនុស្ស១៣នាក់រងរបួស កាលពីវេលាម៉ោង៥ព្រឹក ថ្ងៃទី១២ មីនា ឆ្នាំ២០២១ នៅតាមផ្លូវជាតិលេខ១ ត្រង់ចន្លោះគីឡូម៉ែត្រ ១៣១-១៣២ ស្ថិតក្នុងភូមិ ស្វាយតឿ សង្កាត់ស្វាយតឿ ក្រុងស្វាយរៀង ។
ប្រភពព័ត៌មានពីកន្លែងកើតហេតុ បានឱ្យដឹងថា មុនពេលកើតមានគ្រោះថ្នាក់ចរាចរណ៍នោះ គេឃើញរថយន្តមួយគ្រឿង ម៉ាកឡិចស៊ីស RX៣០០ ពណ៌ទឹកមាស ពាក់ស្លាកលេខ ភ្នំពេញ ២G-៩៥២១ បើកបោះពួយយ៉ាងលឿន តាមបណ្ដោយផ្លូវជាតិលេខ១ ក្នុងទិសដៅពីលិចទៅកើត សំដៅទៅកាន់ក្រុងបាវិត។ លុះពេលរថយន្ដបើកមកដល់ចំណុចកើតហេតុ ស្រាប់តែរេចង្កូតខុសផ្លូវ ក្រឡាប់ផ្ងារជើង បណ្ដាលឲ្យមនុស្ស១៣នាក់ជាជនជាតិចិន ចំនួន១៣នាក់រងរបួស។
ក្រោយពេលកើតហេតុ អ្នកបើករថយន្តបានរត់គេចខ្លួនបាត់។ បន្ទាប់មក សមត្ថកិច្ចបានចេញមកធ្វើអន្តរាគមន៍ ជួយសង្គ្រោះដល់ជនជាតិចិនទាំង១៣នាក់នោះ រួចហើយបញ្ជូនពួកគេទៅព្យាបាល និងធ្វើចត្តាឡីស័ក នៅក្នុងផ្ទះសំណាក់គ្រូបង្រៀនក្រុងស្វាយរៀង៕
