របួសធ្ងន់ស្រាល៣នាក់ ក្នុងហេតុការណ៍ រថយន្តស្ទូច បែកកង់រេចង្កូតបុករថយន្ត ដឹកសាំង នៅស្រុកអង្គស្នួល

ភ្នំពេញ ៖ មនុស្ស ៣នាក់ បានទទួលរងរបួសធ្ងន់ស្រាល ក្រោយជួបគ្រោះថ្នាក់ចរាចរណ៍ រវាង រថយន្តស្ទូច ហ៊ីយ៉ាន់ដាយ បើកបរក្នុងល្បឿនលឿន ខ្វះការប្រុងប្រយ័ត្ន បែកកង់មុខរេចង្កូតជ្រុលទៅបុករថយន្តសណ្តោងធុនធំដឹកសាំងសូគីម៉ិច នៅតាមបណ្តោយផ្លូវជាតិ៤ ក្នុងឃុំបែកចាន ស្រុកអង្គស្នួល ខេត្តកណ្ដាល កាលពីម៉ោង៩ និង៣០នាទីយប់ ថ្ងៃទី១១ ខែមីនា ឆ្នាំ២០២១ ស្ថិត។

ប្រភពព័ត៌មានពីកន្លែងកើតហេតុ បានឲ្យដឹងថា នៅមុនពេលកើតហេតុ គេឃើញរថយន្តសណ្តោងធុនធំដឹកសាំងសូគីម៉ិចមួយគ្រឿង ពណ៌ទឹកប្រាក់ ពាកស្លាក់លេខ ភ្នំពេញ 3A-9627 ធ្វើដំណើរតាមបណ្ដោយផ្លូវជាតិលេខ៤ ទិសដៅពីកើតទៅលិច ក្នុងល្បឿនលឿនគួសម ខណៈមកដល់ចំណុចកើតហេតុខាងលើ ក៏មានរថយន្តស្ទូចមួយគ្រឿងទៀត ម៉ាកហ៊ីយ៉ាន់ដាយ ពណ៌ស ពាក់ស្លាកលេខ ភ្នំពេញ 3G-7667 ធ្វើដំណើរតាមបណ្ដោយផ្លូវជាតិលេខ៤ ទិសដៅពីលិចទៅកើតបញ្ច្រាស់ទិសគ្នា ក្នុងល្បឿនលឿនខ្វះការប្រុងប្រយ័ត្ន ក៏ស្រាបតែវ៉ាប្រជែងរថយន្តមួយគ្រឿងទៀត មិនចាំម៉ាក បែកកង់មុខខាងឆ្វេងរេចង្កូតទៅខាងឆ្វេងដៃ ជ្រុកបុករថយន្តសណ្តោងធុនធំសូគីម៉ិចដឹកសាំងចំពេញទំហឹង បណ្ដាលឲ្យតៃកុងរថយន្តសណ្ដោងធុនធំដឹកសាំងសូគីមិចរងរបួសធ្ងន់ម្នាក់។ រីឯតៃកុងរថយន្តស្ទូចម៉ាកហ៊ីយ៉ាន់ដាយវិញរងរបួសធ្ងន់ម្នាក់បាក់ជើង និងម្នាក់ទៀតរងរបួសស្រាល ត្រូវបានរថយន្តសាមុយដឹកយកទៅមន្ទីរពេទ្យភ្លាមៗតែម្តង។ ចំណែកឯ រថយន្តទាំងពីរគ្រឿងវិញរងការខូចខាតយ៉ាងដំណំផ្នែកខាងមុខដូចគ្នា៕