សមត្ថកិច្ចខេត្តកណ្តាល ឃាត់ខ្លួនជនសង្ស័យ២នាក់ ពាក់ព័ន្ធករណីគ្រឿងញៀននិងដកហូតបានកាំភ្លើងអាកា៤៧មួយដើម

កណ្ដាល ៖ ជនសង្ស័យ២នាក់ ត្រូវបានកម្លាំងអធិការដ្ឋាននគរបាលស្រុកឧដុង្គ សហការជាមួយកម្លាំងអធិការដ្ឋាននគរបាលស្រុកពញាឮ ឃាត់ខ្លួនបាន នៅចំណុចភូមិស្ពានទម្លាប់ ឃុំទំនប់ធំ ស្រុកពញាឮ ខេត្តកណ្ដាល កាលពីថ្ងៃទី ២៨ ខែកុម្ភៈ ឆ្នាំ២០២១ ពាក់ព័ន្ធនឹងគ្រឿងញៀន។

ជនសង្ស័យទាំង២នាក់ មាន ឈ្មោះ ម៉ុន រ៉េត អាយុ៤២ឆ្នាំ នៅភូមិអន្លង់ចំណារ ឃុំចាន់សែន ស្រុកឧដុង្គ (មុខសញ្ញាមានដីកាបង្គាប់ឲ្យចាប់ខ្លួន) និង ឈ្មោះ ស៊ឹម គឹមហ៊ុល ភេទប្រុស អាយុ ៣៤ឆ្នាំ នៅភូមិស្ពានទម្លាប់ ឃុំទំនប់ធំ ស្រុកពញាឮ ខេត្តកណ្ដាល។

សមត្ថកិច្ចបានដកហូតម្សៅក្រាមពណ៌សថ្លាសង្ស័យជាគ្រឿងញៀន៣កញ្ចប់ (២មធ្យម និង១ធំ) ជញ្ជីងថ្លឹងគ្រឿងញៀន១ ម៉ូតូ១គ្រឿង , ទូរស័ព្ទដៃ២គ្រឿង , កាំភ្លើង AK47 ស្វាយបត់១ដើម, បង់១, គ្រាប់ ១៧គ្រាប់ , អាវុធកែច្នៃ១ រួមនឹងឧបករណ៍ប្រើប្រាស់គ្រឿងញៀនមួយចំនួន។

ករណីនេះការិយាល័យជំនាញ កំពុងកសាងសំណុំរឿង ចាត់ការតាមនីតិវិធី៕