បុរសតិរច្ឆាន ចាប់រំលោភកូនស្រីបង្កើត២នាក់ រហូតពេញវ័យ

ភ្នំពេញ: បុរសតិរច្ឆានម្នាក់ បានចាប់កូនស្រីបង្កើតចំនួន២នាក់ តាំងពីនៅតូច រហូតពេញវ័យ តែទីបំផុតក៏បែកការដឹងដល់សមត្ថកិច្ច ចុះទៅឃាត់ខ្លួន និងរំដោះនារីរងគ្រោះទាំង២នាក់បងប្អូន។
យោងតាមផេកហ្វេសប៊ុករបស់អង្គការ Afesip Cambodia បានបង្ហោះខ្លឹមសារថា «តើយើងគួរតែបន្ទោសស្រ្ដីម្តាយដែរឬទេ? ម្ខាងប្តីធ្លាប់កម្សត់កម្រនឹងគ្នា ហើយម្ខាងកូនស្រី បើហ៊ានផ្តេសផ្តាស គេអារ.កកូន។ វេទនាចិត្តពេកហើយសម្រាប់ស្ត្រីជាម្តាយ និងកូនស្រី ដែលមានឪពុកមានចរិតជាសត្វតិរច្ឆានបែបនេះ»។
ប្រភពព័ត៌មាន បានឲ្យដឹងថា ក្មេងស្រីរងគ្រោះទាំង២នាក់ខាងលើនេះ ត្រូវបានឪពុកតិរច្ឆានចាប់រំលោភ តាំងពីពួកនាងនៅតូច រហូតមានអាយុ១៥ឆ្នាំ។ ប៉ុន្ដែនៅពេលគេសាកសួរនាងថា ហេតុអ្វីមិនស្រែក ឬប្រាប់ម្តាយ…? នាងប្រាប់ថា “ស្រែកឯណា បើឪពុករបស់នាងកាន់កាំបិត ភ្ជង់កនាងជាប់រហូត។ បើនាងប្រាប់អ្នកដទៃ ឬម៉ែរបស់នាង ច្បាស់ជាគាត់សម្លាប់ទាំងម្តាយ និងប្អូនរបស់នាងចោលទាំងអស់។ នាងខ្លាចពុកខ្លាំងណាស់ ហើយនៅពេលគាត់ផឹកស្រាស្រវឹងម្ដងៗ គាត់តែងតែធ្វើបាបនាង និងម៉ែរបស់នាងជារៀងរាល់ថ្ងៃ”។
ប្រភពព័ត៌មានដដែល បានដកស្រង់សម្ដីពីក្មេងស្រីរងគ្រោះបន្ដថា នៅពេលបុរសតិរច្ឆានខាងលើផឹកស្រវឹង តែងតែវាយទាត់ធាក់ម្ដាយរបស់នាង ចំកញ្ចឹងករហូតដល់សន្លប់។ នៅពេលនោះ ឪពុករបស់នាងមានឱកាសសម្រាប់ចាប់នាងរំលោភ ហើយនៅពេលនាងរើបម្រះ ឪពុករបស់នាងតែងតែវាយនាង និងយកកាំបិតមកភ្ជង់ក។ បើទោះជានាងខំលើកដៃសំពះអង្វរករយ៉ាងណា ក៏គាត់មិនអាណិតកូននោះឡើយ។ លើសពីនេះទៀត គាត់ថែមទាំងវាយធ្វើបាបនាងបន្ថែមទៀតផង។
ក្មេងស្រីរងគ្រោះបានបន្ថែមទៀតថា ឪពុករបស់នាងតែងតែគំរាមកំហែងដល់នាងថា បើហ៊ានប្រាប់អ្នកដទៃ ឬធ្វើឲ្យបែកការរឿងអាស្រូវរបស់គាត់នឹងសម្លាប់ចោលទាំងរូបនាង និងម្ដាយ។
ទោះជាយ៉ាងណា រហូតមកដល់ពេលនេះ ក្មេងស្រីរងគ្រោះត្រូវបានរំដោះឲ្យគេចផុតពីអំពើដ៏លាមក ហើយនាំទៅរស់នៅក្នុងមណ្ឌលស្តារនីតិសម្បទារបស់អង្គការអាហ្វេស៊ីប ដើម្បីទទួលសេវាគាំពារ រួមទាំងថែទាំសុខភាពផ្លូវកាយ និងសុខភាពផ្លូវចិត្ត ជំនួយផ្នែកច្បាប់ ការបណ្តុះបណ្តាលជំនាញ និងការលើកទឹកចិត្តផងដែរ៕