បរទេស៖ ខ្មាន់កាំភ្លើងបានបើកការវាយប្រហារទៅលើប្រជាពលរដ្ឋ បណ្ដាលឲ្យមនុស្សយ៉ាងហោច៦នាក់ រួមទាំងមន្ត្រីប៉ូលិម្នាក់ផងដែរ។ ហេតុការណ៍នេះ បានកើតឡើង នៅក្នុងផ្សារទំនើបមួយកន្លែង ស្ថិតក្នុងទីក្រុង Boulder នៃរដ្ឋខូឡូរ៉ាដូ Colorado សហរដ្ឋអាមេរិក កាលពីថ្ងៃចន្ទ ទី២២ ខែមីនា ឆ្នាំ២០២១ (ពេលវេលានៅសហរដ្ឋអាមេរិក)។
សារព័ត៌មានស៊ីហួរបស់ចិន បានចេញផ្សាយ នៅថ្ងៃទី២៣ ខែមីនា ឆ្នាំ២០២១ ថា ក្រោយពេលមានការបាញ់ប្រហារនោះ គេមានសេចក្ដីរាយការណ៍ថា មានជនសង្ស័យម្នាក់ត្រូវបានចាប់ខ្លួន។ នេះជាការបាញ់ប្រហារយ៉ាងរង្គាលជាលើកទី២ នៅសហរដ្ឋអាមេរិក គិតត្រឹមរយៈពេលមួយសប្ដាហ៍មកនេះ។ ហេតុការណ៍ខាងលើនេះ បានកើតឡើង បន្ទាប់ពីខ្មាន់កាំភ្លើងម្នាក់បានបាញ់សម្លាប់មនុស្ស៨នាក់ ហើយក្នុងនោះមាន៦នាក់ជាស្ត្រីអាមេរិក មានដើមកំណើតអាស៊ី ស្ថិតក្នុងទីក្រុងអាត្លង់តា នៃរដ្ឋចចចៀ។
ការបាញ់ប្រហារទាំង២ករណីខាងលើ បានកើតឡើង ចំពេលមានអំពើហិង្សា ប្រឆាំងនឹងពលរដ្ឋអាមេរិក ដើមកំណើតអាស៊ី កំពុងកើនឡើងខ្លាំង នៅក្នុងសហរដ្ឋអាមេរិក។ ជាមួយគ្នានេះដែរ លោក ចូ បៃដិន ប្រធានាធិបតីអាមេរិក បានអំពាវនាវឱ្យប្រជាពលរដ្ឋអាមេរិកទាំងអស់ ក្រោកឈរឡើង ប្រឆាំងនឹងការរើសអើងពូជសាសន៍ ហើយត្រូវធានាឱ្យបានថា គ្មានចន្លោះទំនេរណាមួយ សម្រាប់ការរើសអើងពូជសាសន៍ នៅលើទឹកដីសហរដ្ឋអាមេរិក នោះឡើយ៕
