អីក៏ចិត្តអាក្រក់យ៉ាងនេះ!ប្តីប្រពន្ធ២នាក់ត្រូវសមត្ថកិច្ចឃាត់ខ្លួនក្រោយពីវាយធ្វើបាបកូនពីរនាក់ឱ្យរងរបួស

ខេត្តកំពង់ស្ពឺ៖សូមបញ្ឈប់ការប្រើហិង្សាលើកុមារបន្តទៀតទៅព្រោះវាជាអំពើខុសច្បាប់!ជាក់ស្តែងដូចជាករណីនេះអ៊ីចឹងប្តីប្រពន្ធពីរនាក់រួមគ្នាវាយធ្វើបាបកូនបង្កើតនិងកូនដើមខ្លួនឯងបណ្តាលឱ្យរងរបួសពេញខ្លួនត្រូវកម្លាំងនគរបាលក្រុងច្បារមនឃាត់ខ្លួនយកទៅសាកសួរ។

ករណីនេះបានកើតឡើងកាលពីព្រឹកថ្ងៃទី១៦ខែមីនាឆ្នាំ២០២២នៅចំណុចផ្ទះជួលក្នុងភូមិសា្វយក្រវាន់ សង្កាត់ស្វាយក្រវាន់ក្រុងច្បារមនខេត្តកំពង់ស្ពឺ។លោកអ៊ូចហៀងអធិការនគរបាលក្រុងច្បារមនបានឱ្យដឹងថា សមត្ថកិច្ចបានឃាត់ខ្លួនបុរសជាប្តីឈ្មោះហែម វិរៈ (ហៅឡូ) អាយុ៤២ឆ្នាំ និងប្រពន្ធឈ្មោះឡាត់ ស្រីពៅ អាយុ៤៥ឆ្នាំ ពីបទពួកគេបានធ្វើសកម្មភាពវាយធ្វើបាបកូនរបស់ខ្លួនឱ្យរងរបួសធ្ងន់ពេញខ្លួន ដែលពួកគេបានប្រព្រឹត្តកាលពីរសៀលថ្ងៃទី១៥ ខែមីនាឆ្នាំ២០២២។
ក្មេងប្រុសរងគ្រោះដែលត្រូវម្តាយចុងវាយធ្វើបាបឱ្យរងរបួសពេញខ្លួននោះម្នាក់ឈ្មោះភ័ណ្ឌ វីរៈបញ្ញា ភេទប្រុសអាយុ១៣ឆ្នាំនិងម្នាក់ឈ្មោះភ័ណ្ឌវីរៈសក្កដាភេទប្រុសអាយុ១០ឆ្នាំដែលរស់នៅក្នុងបន្ទុក។លោកអធិការនគរបាលក្រុងច្បារមនបានបន្តឱ្យដឹងទៀតថាក្រោយពីសាក្សីដែលរស់នៅបន្ទប់ជួលក្បែរគ្នារាយការណ៍ពីសកម្មភាពដ៏ឃោរឃៅរបស់ស្ត្រីជាម្តាយចុងខាងលើនេះលោកក៏បានចាត់កម្លាំងព្រហ្មទណ្ឌក្រុងសហការជាមួយកម្លាំងប៉ុស្តិ៍ចុះធ្វើអន្តរាគមន៍ភ្លាមៗដោយឃាត់ខ្លួនស្ត្រីជាម្តាយចុងនិងប្តីជាឱពុកយកមកការិយាល័យជំនាញដើម្បីសួរនាំ។បច្ចុប្បន្នកុមារទាំងពីរនាក់ត្រូវបានកម្លាំងការិយាល័យប្រឆាំងការជួញដូរមនុស្សនិងការពារអនីតិជននៃស្នងការខេត្តកំពង់ស្ពឺកំពុងសាកសួរនាំបន្ថែមដើម្បីរកភ័ស្តុតាងបន្ថែមទៀត។ដោយឡែកស្ត្រីដៃដល់និងប្តីជាឱពុកបង្កើតកំពុងស្ថិតក្រោមការសួរនាំបន្តរបស់សមត្ថកិច្ចជំនាញ៕