ភ្នំពេញ៖ កាលពី រសៀល ថ្ងៃទី២៤ ខែវិច្ឆិកា ឆ្នាំ២០២១ នៅបន្ទប់ជួលជាន់ទី៣ ក្នុងភូមិត្រពាំង ក្រសាំង សង្កាត់ត្រពាំងក្រសាំង ខណ្ឌពោធិសែនជ័យ រាជធានីភ្នំពេញ ។ ជនសង្ស័យប្រុស-ស្រី ចំនួន ៤ នាក់ ត្រូវបានកម្លាំងសមត្ថកិច្ច សហការជាមួយ កម្លាំងអាជ្ញាធរមូលដ្ឋាន ឃាត់ខ្លួន ដកហូតបានថ្នាំញៀន ឧបករណ៍ ឆ្កឹះសោ និងសម្ភារៈពាក់ព័ន្ធ មួយចំនួនទៀត ។ជនសង្ស័យទាំង ៤ នាក់នោះ គឺៈ ១.ឈ្មោះ រុំ សុខដែន ភេទប្រុស អាយុ៣០ឆ្នាំ ស្រុក កំណើតនៅខេត្ត កោះកុង ។ ២.ឈ្មោះ ខៀវ ប៉ាច់ ភេទស្រី អាយុ៤៨ឆ្នាំ ស្រុកកំណើត នៅខេត្តតាកែវ ត្រូវជាប្រពន្ធរបស់ជនសង្ស័យទី១ ។ ៣.ឈ្មោះ ចឹក ស្រីណុច ភេទស្រី អាយុ៣៣ឆ្នាំ មានស្រុកកំណើត ស្រុកស្អាង ខេត្តកណ្ដាល និង៤.ឈ្មោះ ឃឹម ចាន់វាសនា ភេទប្រុសអាយុ២៩ឆ្នាំ មុខរបរ កម្មកររោងចក្រ មានទីលំនៅភូមិអូរដឹម សង្កាត់ចោមចៅ៣ ខណ្ឌពោធិសែនជ័យ ។
ក្រោយពីទទួលបាន សេចក្តីរាយការណ៍ ពីម្ចាស់ផ្ទះជួល ខាងលើ ជុំវិញសភាពការណ៍ ក្នុងមូលដ្ឋាន ញឹកញាប់ពេកហើយ បងប្អូនដែលស្នាក់នៅ តាមបន្ទប់ជួល បាត់បង់សម្ភារៈ របស់របរប្រើប្រាស់ផ្សេងៗ និងសង្ស័យមានអ្នកលួច ជក់គ្រឿងញៀន ទើបនៅរសៀល ថ្ងៃទី២៤ ខែវិច្ឆិកា ឆ្នាំ២០២១ ដោយមានការដឹកនាំ ដោយលោក នាង ឧត្តម នាយប៉ុស្តិ៍រដ្ឋបាល ក្រោមបញ្ជាពីលោក វរសេនីយ៍ឯក ម៉ន វុធី អធិការខណ្ឌពោធិ៍សែនជ័យសហការ ជាមួយ កម្លាំងអាជ្ញាធរសង្កាត់ រួមជាមួយម្ចាស់ផ្ទះ បានត្រួតពិនិត្យ តាមបន្ទប់ជួល ឈានដល់ឃាត់ខ្លួន ជនសង្ស័យបាន ៤ នាក់ ប្រុស២នាក់ ស្រី២នាក់លុះត្រួតពិនិត្យ មើល ក្នុងបន្ទប់ជនសង្ស័យ រកឃើញសម្ភារៈ ដែលអ្នកជិតខាង បានបាត់បង់ កន្លងមក ថ្នាំញៀន ១កញ្ចប់ ឧបករណ៍ឆ្កឹះសោ ចំណែកបន្ទប់មួយទៀត រកឃើញសំណល់ គ្រឿងញៀន ថង់សម្រាប់ច្រកគ្រឿងញៀន និងសម្ភារៈឧបករណ៍ជក់ពាក់ព័ន្ធ មួយចំនួនទៀត ។ឃាត់ខ្លួនបានជនសង្ស័យ ទាំង៤នាក់ ពាក់ព័ន្ធបទល្មើសលួច និងប្រើប្រាស់ គ្រឿងញៀន សមត្ថកិច្ច ក៏បាននាំទៅសាកសួរ នៅប៉ុស្តិ៍ត្រពាំងក្រសាំង ដើម្បីកសាង សំណុំរឿង បញ្ជូនទៅផ្នែកជំនាញ ចាត់ការបន្ត តាមនីតិវិធី ៕
