ខេត្តកណ្តាល ៖ ម្ចាស់គណនីហ្វេសប៊ុកឈ្មោះ Hea Dii បង្ហោះថា កាលពីថ្ងៃទី២៣ ខែតុលា ឆ្នាំ២០២១ ម៉ោងប្រហែល៩និង៥៥នាទី ខណៈដែលខ្លួនបានជិះកាត់តាមផ្លូវកំពង់សំណាញ់ ទិសដៅពីកើតទៅលិច ហួសសាលាសង្កាត់កំពង់សំណាញ់ ប្រហែល២០ម៉ែត្រ មានគ្រាប់កាំភ្លើង(កាំភ្លើងកែច្នៃក៏មិនច្បាស់) មួយបាញ់ចេញពីខាងឆ្វេងដៃលោក ហើយត្រូវកញ្ចាក់ ផ្នែកខាងក្រោយ ជិតនឹងក្បាលរបស់លោក ហើយក៏ជាសំណាងផងដែរ ដែលខ្ញុំមិនបានកើតអី ។
ក្រោយពីមានករណីនេះ កើតឡើង ក្រុមការងារប្រតិកម្មរហ័សខេត្ត ដឹកនាំដោយលោកឧត្តមសេនីយ៍ទោ ឈឿន សុចិត្ត ស្នងការនគរបាខេត្តកណ្តាល បានចាត់ឲ្យលោកអធិការនគរបាលក្រុងតាខ្មៅ ស្រាវជ្រាវកណីខាងលើ ដោយនៅថ្ងៃទី២៤ ខែតុលា ឆ្នាំ២០២១ លោកអធិការបានបញ្ជាកម្លាំងប៉ុស្តិ៍នគរបាលរដ្ឋបាលកំពង់សំណាញ់ ចុះស្រាវជ្រាវករណីខាងលើឃើញនៅម៉ោងប្រហែល៩ព្រឹកថ្ងៃទី២៤ ខែតុលា ឆ្នាំ២០២១ ជនរងគ្រោះបានមកដាក់ពាក្យបណ្តឹងនៅប៉ុស្តិ៍នគរបាលរដ្ឋបាលកំពង់សំណាញ់ លើករណីធ្វើឲ្យខូចខាតដោយចេតនា នៅចំណុចលើផ្លូវលេខ២០១មុខផ្ទះ ប្រជាពលរដ្ឋឈ្មោះ យុទ្ធគុណ ភូមិកំពង់សំណាញ់១ សង្កាត់កំពង់សំណាញ់ ក្រុងតាខ្មៅ ខេត្តកណ្តាល ។
សមត្ថកិច្ច បានឲ្យដឹថា ជនរងគ្រោះ ឈ្មោះ អ៊ូ ចេនឌីឡា ភេទប្រុស អាយុ២១ឆ្នាំ ជនជាតិខ្មែរ ទីលំនៅភូមិព្រែករាំង សង្កាត់កំពង់សំណាញ់ ក្រុងតាខ្មៅ ខេត្តកណ្តាល មុខរបរនិស្សិត។ ខូចរថយន្តម៉ាក Range Rover ស៊េរីឆ្នាំ២០១០ ពណ៌ស ពាក់ស្លាកលេខ ភ្នំពេញ 2BE-7507 ធ្លុះកញ្ចក់ទ្វារថយន្តចំហៀងខាងឆ្វេង ផ្នែកខាងក្រោយ១ផ្ទាំង។
ជុំវិញនឹងករណីនេះ កម្លាំងសមត្ថកិច្ចជំនាញពាក់ព័ន្ធ សហការជាមួយកម្លាំងប៉ុស្តិ៍នគរបាលរដ្ឋបាលកំពង់សំណាញ់ បើកការស្រាវជ្រាវបន្ថែមរកជនបង្ក នាំមកចាត់ការតាមផ្លូវច្បាប់ តែលទ្ធផលយ៉ាងណានោះ ពលរដ្ឋកំពុងរង់ចាំមើល៕
