ភ្នំពេញ៖ ស្ត្រីម្នាក់ ខណៈជិះម៉ូតូចេញពីផ្ទះទៅធ្វើការ ត្រូវបានជនសង្ស័យ២នាក់ធ្វើសកម្មភាពឆក់យកកាបូបយកទូរស័ទ្ទស៊េរីទំនើប១គ្រឿង និងប្រាក់ចំនួន៧០០ដុល្លារ រួចជិះម៉ូតូគេចខ្លួនបាត់ស្រមោល បណ្ដាលឱ្យជនរងគ្រោះដួលរងរបួសរលាត់ដៃជើង ។ហេតុការណ៍នេះ បានកើតឡើង កាលពីវេលាម៉ោង៦ និង២០នាទីព្រឹក ថ្ងៃទី១៨ ខែតុលា ឆ្នាំ២០២១ នៅតាមបណ្ដោយផ្លូវថ្នល់រទេះភ្លើង ស្ថិតក្នុងសង្កាត់កាកាប២ ខណ្ឌពោធិ៍សែនជ័យ ។
ស្រ្តីរងគ្រោះរាប បានរាប់ឲ្យដឹងថា នៅមុនពេលកើតហេតុ គាត់បានជិះម៉ូតូម៉ាកហុងដាឌ្រី មួយគ្រឿង ពណ៌ខ្មៅពាក់ស្លាកលេខ ភ្នំពេញ 1GY-4615 ចេញមកពីផ្ទះ ទៅធ្វើការ ដោយធ្វើដំណើរតាមបណ្ដោយផ្លូវថ្នល់រទះភ្លើងខណៈពេលមកដល់ត្រង់ចំណុចកើតហេតុ ស្រាប់តែលេចមុខជនសង្ស័យ២នាក់ជិះម៉ូតូម៉ាក់ឌ្រីមសងពណ៌ខ្មៅ មិនចាំស្លាកលេខជិះមកអែបក្បែរ ហើយក៏បានធ្វើសកម្មភាពឆក់យកកាបូបដៃរបស់គាត់បានសម្រេចតែម្ដង ហើយក៍ព្យាយាមជិះរត់គេចខ្លួនបាត់ស្រមោល ធ្វើឲ្យគាត់ដួលម៉ូតូរលាត់ដៃនឹងជើង។
ស្រ្តីរងគ្រោះ បញ្ជាក់ថា នៅក្នុងកាបូបដែលជនសង្ស័យឆក់យកទៅនោះ មានទូរស័ព្ទដៃម៉ាកសឺវែនផ្លើស១គ្រឿង និងលុយចំនួន៧០០ដុល្លា។ក្រោយកើតហេតុសមត្ថកិច្ចបានចុះអន្តរាគមន៍ដល់កន្លែងកើតហេតុ តែស្រ្តីរងគ្រោះមិនបានដាក់ពាក្យបណ្ដឹងទេ ព្រោះមិនសង្ឃឹមថា សមត្ថកិច្ចចាប់ជនសង្ស័យបាន និងយកទ្រព្យសម្បត្តិរបស់គាត់បានមកវិញទេ ដោយទូរស័ព្ទហៅក្រុមគ្រួសារមកយកទៅព្យាបាលរបួសដោយខ្លួនឯង ៕
