ខេត្តក្រចេះ ៖ នៅថ្ងៃទី១១ ខែតុលា ឆ្នាំ២០២១ វេលាម៉ោង២២ និង០០នាទី ដោយមានការចង្អុលបង្ហាញពីលោកឧត្តមសេនីយ៍ស្នងការ កម្លាំងនគរបាលព្រហ្មទណ្ឌ សហការជាមួយកម្លាំងអធិការដ្ឋាននគរបាលស្រុកស្នួល ដឹកនាំដោយលោក វរសេនីយ៍ឯក គុណ សុភ័ណ្ឌ ស្នងការរងទទួលផែនការងារនគរបាលព្រហ្មទណ្ឌ និងសម្របសម្រួលនីតិវិធីដោយលោក រ៉ា បូរ៉ាន់ឌី ព្រះរាជអាជ្ញារងអមសាលាដំបូងខេត្តក្រចេះ បានចុះការបង្ក្រាបករណីលេងល្បែងស៊ីសងខុសច្បាប់ (បៀរម៉ាជាំង) ០១កន្លែង។
ប្រតិបត្តិការនេះ ធ្វើឡើង នៅចំណុចរវៀងជ័យ ភូមិថ្នល់ ឃុំស្វាយជ្រះ ស្រុកស្នួល ខេត្តក្រចេះ ដោយកម្លាំងសមត្ថកិច្ចបានឃាត់ខ្លួនជនជាតិចិនចំនួន០៧នាក់ (ស្រី០១នាក់) ព្រមទាំងដកហូតវត្ថុតាង តុម៉ាស៊ីនចែកបៀរ និងបៀរ(ម៉ាជាំង)មួយចំនួនផង នាំមកចាត់ការតាមផ្លូវច្បាប់៕
