ចិន៖ ទឹកជំនន់ដ៏ធំដែលបណ្តាលមកបីភ្លៀងធ្លាក់ខ្លាំងជាបន្តបន្ទាប់នៅក្នុងផ្នែកជាច្រើនស្ថិតនៅភាគកណ្តាលប្រទេសចិនកាលពីថ្ងៃអង្គារសប្តាហ៍នេះបានបង្ខំឲ្យពលរដ្ឋភៀសខ្លួនចេញពីផ្ទះសម្បែងរកទីទួលសវុត្ថិភាព និងបានជន់លិចចំណតដឹកជញ្ជូនសាធារណៈ ព្រមទាំងផ្លូវថ្នល់នានាផងដែរ ។
បើតាមអាជ្ញាធរបានឲ្យដឹងថា ពលរដ្ឋជាង ១ម៉ឺននាក់នៅខេត្តហឺណាន (Henan) ត្រូវបានជម្លៀសទៅកាន់ជម្រកសុវត្ថិភាពបន្ទាប់ពីមានភ្លៀងធ្លាក់ខ្លាំង។អាជ្ញាធរបានបញ្ជាក់ថា មនុស្សយ៉ាងហោចណាស់ ១២នាក់បានស្លាប់នៅក្នុងទីក្រុងហ្សេងចូវ (Zhengzhou) ចាប់តាំងពីទឹកជំនន់បានចាប់ផ្តើមមក។ ខណៈដែលទីក្រុងជាងដប់បានរងផលប៉ះពាល់ដោយផ្លូវសំខាន់ៗត្រូវបានបង្ខំឲ្យបិទចរាចរណ៍ ហើយជើងហោះហើរជាច្រើនត្រូវបានលុបចោល។ខេត្តហឺណាន (Henan) ដែលមានពលរដ្ឋប្រមាណ ៩៤លាននាក់បានចេញការព្រមានពីអាកាសធាតុក្នុងកម្រិតខ្ពស់បំផុតបន្ទាប់ពីមានភ្លៀងធ្លាក់ខ្លាំងខុសពីធម្មតា ។
ទន្ទឹមនឹងនេះគេសង្កេតឃើញដងផ្លូវទាំងមូលត្រូវបានលិចលង់ដោយមានរថយន្ត និងកំទេចកំទីបានអណ្ដែតនៅក្នុងទឹកជំនន់ដែលកំពុងហូរយ៉ាងលឿន ស្របពេលដែលអាជ្ញាធរក៏កំពុងព្រួយបារម្ភពីទំនប់មួយនៅក្នុងខេត្តហឺណាន (Henan) អាចនឹងបាក់បន្ទាប់ពីវាបានរងការខូចខាតដោយព្យុះកាលពីពេលថ្មីៗនេះ ៕
